​Os regatistas galegos estréanse na competición olímpica

Fernando Echávarri e Tara Pacheco. //Foto: costaldelmar_es twitter

Este mércores pola tarde comezan as competicións de vela para os galegos que viaxaron a Río. O primeiro en subir ao veleiro é o pontevedrés Fernando Echávarri, que compite xunto coa canaria Tara Pacheco. Serán os primeiros Xogos nos que compitan xuntos, pero non son novatos: Fernando participou en Atenas e Pekín e Tara fixo o propio en Londres.

O venres será o turno dos outros dous regatistas galegso, o 49er X da pontevedresa Támara Echegoyen, que aspira a repetir no Brasil o ouro de Londres, e o do barbanzán Iago López.

A vela é o deporte con máis medallas olímpicas no casilleiro español, con 13 ouros, os dous últimos en Londres, e outras seis medallas máis.

TIRO CON ARCO

Outro Galego, o pontés Miguel Alvariño, caeu eliminado en dezaseisavos fronte ao surcoreano Lee Seungyun, oitavo do mundo. Polo tanto, remata a súa participación olímpica. Na primeira das eliminatorias superara o francés Lucas Daniel.

NATACIÓN

Esta madrugada, Michael Phelps fixo aínda máis grande a súa lenda, ao conseguir a terceira medalla nestes Xogos e chegar aos 21 ouros en toda a súa carreira. Conta con 25 en total. O mellor nadador de todos os tempos gañou a final dos 200 metros bolboreta e o 4x200 libre.

Pola súa banda, Mireia Belmonte, a estrela española da natación clasificouse para a final dos 200 metros estilos, tras pechar as 'semis' coa segunda mellor marca de todas as participantes.