Unións Agrarias chama á Xunta a facer auditorías para evitar a entrada de uva foránea

O sindicato Unións Agrarias pediu á Xunta que realice auditorías nas explotacións previas á vendima, co obxectivo de evitar a entrada de uva foránea ante as previsións de que se produza unha caída "do 20 por cento na produción".

O secretario xeral de Unións, Roberto García, manterá este xoves unha reunión coa directora xeral de Gandería, Agricultura e Industrias Agroalimentarias, Belén Docampo, na que lle trasladará a petición de que o Goberno galego se implique "no impulso á contractualización da compra da uva".

Segundo indicou o sindicato a través dun comunicado, a vendima deste ano "vai traer graves problemas de prezo nas cinco denominacións de orixe" debida ás "resistencias" das adegas para asinar contratos "a longo prazo" e "fixar un prezo por negociación e non por imposición" como, aseguran, está a acontecer nestes momentos.

Así mesmo, Unións pedirá á Xunta que "contemple" unha partida de axudas a aquelas explotacións que se viron afectadas polas inclemencias meteorolóxicas --como recentemente ocorreu na zona de Amandi, en Sober (Lugo)--, os danos provocados pola seca ou a praga do mildeu.

DELICADA SITUACIÓN

Así as cousas, denunciou que moitas explotacións agrarias "non puideron contratar seguros agrarios" debido á delicada situación económica que atravesan, ocasionada por "a caída da rendibilidade" motivada por "o prezo que se percibe polas uvas e os recortes do Ministerio de Agricultura nos fondos de Enesa".

Por tanto, Unións Agrarias reclama que estas explotacións non teñan que pagar "as cotas da Seguridade Social durante os meses necesarios para equilibrar minimamente as contas".