O traballador de Finsa falecido desobstruía unha cinta cando quedou atrapado

Comisións Obreiras (CCOO) lamenta o falecemento dun traballador de 59 anos e afiliado a este sindicato na fábrica de Finsa en Padrón (A Coruña) e espera que a investigación aclare as causas do sinistro.

A través dun comunicado, a central traslada a súa solidariedade á familia. Este luns reuníronse na factoría membros do comité de empresa, da área de saúde laboral de CCOO e a inspección de Traballo.

Os representantes do sindicato, segundo indica a nota de prensa, puideron acceder ao lugar do accidente. "O único que se pode confirmar por agora é que o operario faleceu sobre as catro da mañá cando efectuaba labores de desobstrucción nunha cinta de evacuación de residuos", apunta.

Por causas que se descoñecen, a máquina atrapou ao traballador, segundo sinala a organización sindical, que engade que no momento do suceso había máis empregados na fábrica" pero aparentemente sen contacto visual directo" con este compañeiro.

Así as cousas, CCOO seguirá "moi de preto" a investigación deste "fatídico" accidente e, segundo cales sexan as conclusións, pedirá a adopción ou reforzo de medidas preventivas para evitar que "unha nova desgraza" volva ocorrer.