​Bescansa ve a En Marea "liderando" a formación dun goberno alternativo

A secretaria de Análise Política e Social de Podemos, Carolina Bescansa, ve a En Marea "liderando" a formación dun goberno alternativo ao de Alberto Núñez Feijóo a partir de "a mañá do luns", en cuxas negociacións con outras forzas "só" haberá discusións "de matiz".

Así o indicou este xoves na capital galega, onde mantivo un coloquio co candidato de En Marea á Presidencia da Xunta, Luís Villares, moderado pola concelleira de Santiago, Marta Lois (Compostela Aberta).

Alí, a santiaguesa evitou facer declaracións aos medios tras a polémica xurdida no seo de Podemos logo do cruzamento de mensaxes entre os seus números uno e dous --Pablo Iglesias e Íñigo Errejón-- o pasado mércores, cando o primeiro endureceu o discurso da formación morada na súa intervención nun mitin de En Marea na Coruña e o segundo reprochásello vía redes sociais.

Así as cousas, Bescansa manifestou que está "segura" de que, se o PP non consegue a maioría absoluta o vindeiro domingo, as outras forzas políticas --que, na súa opinión, estarán lideradas por En Marea-- non terán problemas para formar un goberno alternativo ao de Núñez Feijóo e alcanzarán acordos "sobre o que se ten que acabar e o que ten que empezar".

Con todo, recoñeceu que "a partir da mañá do luns" produciranse discusións, pero que estas se cinguirán a cuestións "de matiz", polo que non cre que se vaian a repetir os problemas que tiveron as forzas políticas estatais para formar un goberno alternativo ao do PP tras as eleccións xerais de decembro do pasado ano.

"PROXECTO IMPARABLE"

Deste xeito, a número tres de Podemos ve a En Marea como continuadora de "un proxecto político imparable en Galicia, España e o sur de Europa", ante o "colapso" da "democracia representativa", que avanzará "máis rápido ou máis amodo", pero cuxo obxectivo é "cambiar o funcionamento das institucións".

Unhas institucións que Bescansa ve comparables a unha "roda de hámster" na que "a xente dá voltas sen chegar a ningún sitio", xa que, na súa opinión, o seu funcionamento convértese nun "mecanismo para paralizar a chegada da xente con forzas de transformación".

Así mesmo, lembrou que "dúas de cada tres" persoas que se atopan hoxe en día en España baixo o limiar da pobreza "xa eran pobres" antes do inicio da crise económica en 2008, polo que o "cambio" ha de ser de carácter "estrutural e de fondo".

"Xa había inxustiza antes de 2008. Non imos facer unha viaxe para espertar en 2007, temos que modificar o sistema produtivo do país", indicou, para logo incidir en que esta transformación "é unha cuestión de emerxencia" que debe afrontarse "canto antes".

VILLARES E O "TRAXE" DO AUTOGOBERNO

Pola súa banda, o candidato de En Marea á Presidencia da Xunta, Luís Villares, comparou o autogoberno cun "traxe" que hai que comprobar se queda "xusto" a Galicia, pero que "necesita remiendos por moitos lados".

Con todo, sinalou que Galicia "non estira" o autogoberno todo o que podería, xa que determinados apartados do Estatuto "quedan pequenos" e outros están "ermos de desenvolvemento".

Tras o acto desta mañá, Villares e Bescansa desprazaranse a Ourense para participar a última hora da tarde no mitin central do penúltimo día de campaña, nun acto no que volverá estar presente o histórico dirixente do nacionalismo galego, Xosé Manuel Beiras.