Case dúas semanas coas reservas do grupo Cero negativo baixas

As reservas do grupo sanguíneo Cero negativo (0-) seguen baixas na Comunidade galega, mentres que as da positivo (A+) están en boa situación e as de Cero positivo (0+) e A negativo (A-) permanecen normais, segundo a información facilitada pola Axencia de Doazón de Órganos e Sangue (ADOS).

O 25 de outubro, a axencia xa alertou de que os niveis do Cero negativo eran baixos e animou en varias ocasións a doar antes da ponte, pero as reservas seguen sen recuperarse.

ADOS lembra que para poder atender as necesidades dos centros sanitarios galegos son necesarias 500 doazóns de sangue cada día, polo que subliña a importancia de acudir a doar de todos os grupos sanguíneos.

Co fin de facilitar a doazón, este luns 7 de novembro, acudirán unidades móbiles do Centro de Transfusión de Galicia aos municipios coruñeses de Ferrol --barrio de Caranza--, A Coruña --ETS Arquitectura e TGSS na Praza de Vigo-- e Santiago --diante da entrada da Facultade de Economía e Empresariais--.

Tamén o luns desprazaranse unidades móbiles ao municipio lucense de Foz --á beira do Concello--; ao ourensán de Barbadás --fronte á farmacia--; e aos pontevedreses de Vigo --zona O Calvario--, Arbo --á beira da biblioteca-- e Pontevedra --zona Ferrería xunto á igrexa da Peregrina--.