​Seguen tentando recuperar o móbil de Diana Quer

O delegado do Goberno en Galicia, Santiago Villanueva, afirmou este luns que os expertos de Criminalística seguen coa análise do móbil de Diana Quer e puntualizou que "hai que ir con todo o coidado para evitar poder destruír algún tipo de dato".

"É un móbil que estaba en auga salgada, co cal estaba bastante danado", aclarou Villanueva, que explicou que "unha vez que se recupera, procédese ao proceso para tentar sacar algunha información" por parte dos expertos "para ver se é ou non útil para a investigación".

INVESTIGACIÓN "MOI AMPLA"

Por iso, recalcou que "segue a investigación aberta" e a análise do móbil "é unha das partes da investigación". Preguntado sobre a suposta presenza de varios homes con Diana Quer na zona do peirao de Taragoña na noite da súa desaparición apuntada por testemuñas, o delegado do Goberno lembrou que as pescudas están "baixo segredo de sumario e todos os datos que poida haber acerca da investigación, que poden ser moitísimos" non pode desmentilos, "nin confirmar". "A investigación é moi ampla", resaltou.

"Está a empezarse co do móbil", matizou, "e coas testemuñas, xunto con outra serie de datos, xunto coas cámaras, análises doutro tipo de móbil, todo iso sumado, e unha vez que se saquen as correspondentes conclusións iniciarase a liña cara a un lado ou outro", afirmou.

"PRIORIZAR UNHA LIÑA Ou OUTRA"

Por iso, insistiu en que "todas as hipóteses están abertas" e pediu "deixar que Garda Civil de Galicia e Servizos Centrais continúen investigando". Con todo, apuntou que como consecuencia deses datos analizados, os investigadores van priorizar "unha liña de investigación e outra".

O sumario relativo a esta investigación permanece baixo segredo por orde do Xulgado de Instrución Número 1 de Ribeira (A Coruña) ata o 20 de novembro, segundo a última prórroga acordada.

A moza de 18 anos de idade desapareceu o pasado 22 de agosto no municipio coruñés da Pobra do Caramiñal, onde veraneaba coa súa nai e a súa irmá menor.