​A Mesa chama a que esta lexislatura "sexa a do impulso do galego"

Marcos Maceira, presidente da Mesa Pola Normalización Lingüística.

A Mesa Pola Normalización Lingüística remitiu un escrito a todos os grupos parlamentarios presentes no Pazo do Hórreo no que solicita un encontro con cada un deles para "acordar as primeiras accións a favor do galego" na lexislatura que arrincou este xoves.

A través dun comunicado, A Mesa reclama que o próximos catro anos deben servir para "eliminar as trabas que impiden a normalización da lingua galega", á vez que lembra ás catro forzas presentes na Cámara galega "o acordado con todas elas na 'Declaración de Unidade a favor da lingua galega', asinada o 15 de xullo de 2015".

Deste xeito, o presidente da Mesa, Marcos Maceira, instou aos grupos parlamentarios a "reverter o proceso de desgaleguización e perda de falantes que sofre" o galego e que, na súa opinión, se viu"acelerado nas últimas lexislaturas".

Así as cousas, manifestou que "non se pode demorar máis" a aplicación dos acordos alcanzados na dita declaración, da que, ademais dos grupos presentes na pasada lexislatura no Pazo do Hórreo, tamén forman parte outras forzas políticas "con representación municipal".

"VONTADE POLÍTICA" PARA APLICAR OS ACORDOS

"Todos os grupos da Cámara falaron hoxe (por este xoves) de actuar a favor do galego e de chegar a acordos respecto diso", indica A Mesa, que cre que estes "acordos xa están aprobados polo propio Parlamento pero é necesaria vontade política para aplicalos".

Por último, lembrou que esta entidade "xa remitiu a todas as organizacións" que concorreron aos comicios autonómicos celebrados o pasado 25 de setembro unha proposta de "seis medidas urxentes", que teñen relación "coa CRTVG, a educación e o lecer infantil e xuvenil, a administración pública, os transportes, o intercambio do sinal de Rádioa Televisión Portuguesa (RTP) e a CRTVG e o condicionamento de subvencións".