A Coruña e Vigo son os lugares menos rendibles para mercar unha vivenda e alugala
Aínda que a rendibilidade medra un pouco cada ano, en Galicia fíxoo só nunha décima entre 2015 e 2016 e é a máis baixa do Estado.
A Coruña e Vigo son os municipios menos rendibles para comprar unha vivenda destinada ao aluguer, cun 3,6% e un 4,2% de rendibilidade. Do resto de España, séguenlle Bilbao e Granada (4,5%), segundo se desprende dun estudo realizado por fotocasa. A web inmobiliaria atribúe esta situación a que "o prezo dos pisos de segunda man non está a caer ao mesmo ritmo que noutros municipios e o prezo do aluguer está máis equilibrado".
A compra dun inmoble para alugar en España ofrece na actualidade unha rendibilidade do 5,4% de media, mentres que en 2015 era do 5,2% e en 2014 do 5%, o que mostra que "adquirir unha propiedade para alugala é cada ano un pouco máis rendible".
As comunidades máis rendibles para comprar unha vivenda e alugala son Cataluña, cunha rendibilidade da 6,1% fronte ao 5,4% de 2015; Murcia, cun 5,7% de rendibilidade fronte ao 5,1% do ano anterior; Canarias, cunha 5,6% fronte ao 5,5% de 2015, e Madrid, que ten unha rendibilidade do 5,6%, mentres que en 2015 foi do 5,2%.
Pola contra, Galicia, con rendibilidade da 4,1% fronte ao 4% de 2015; País Vasco, cunha rendibilidade da 4,6% fronte ao 4,3% de 2015; e Cantabria e Asturias, con rendibilidades da 4,8% fronte ao 4,5% e ao 4,6%, respectivamente; son as rexións españolas que ofrecen unha menor rendibilidade.
Tendo en conta os municipios con máis habitantes, Hospitalet de Llobregat (6,4%), Las Palmas de Gran Canaria (5,6%) e Córdoba e Palma de Mallorca (5,4%), son as zonas máis rendibles para comprar unha vivenda e poñela en aluguer.
O "apetito" dos medianos e grandes investidores, que compran vivenda en España en busca das altas rendibilidades que ofrece o aluguer, é un dos motores da reactivación do mercado inmobiliario español, segundo afirmou a responsable de estudos de fotocasa, Beatriz Toribio.
Escribe tu comentario