Os dez conselleiros toman posesión

Nove conselleiros xuraron e un, Valeriano Martínez, prometeu o seu cargo no acto de toma de posesión como membros do Goberno que preside Alberto Núñez Feijóo para a X Lexislatura e que o compoñen as mesmas caras do último gabinete que o acompañou desde outubro de 2015, cando o mandatario autonómico desdobrou os departamentos de Mar e Medio Rural e creou unha carteira de Política Social.

Así, un a un e empezando polo vicepresidente da Xunta e conselleiro de Presidencia, Administracións Públicas e Xustiza, Alfonso Rueda, os membros do executivo de Feijóo, quese reúnen xunto a el no primeiro Consello da Xunta na mesma mañá deste luns, prestaron a súa declaración ante o Estatuto de Autonomía e a Constitución, que acatarán e farán preservar, así como a Biblia no caso do xuramento.

O acto institucional, que se desenvolveu nas dependencias autonómicas do Pazo de Raxoi, lugar no que o presidente da Xunta asinou este domingo o decreto de nomeamentos, que publica este luns o Diario Oficial de Galicia (DOG), contou cunha nutrida representación institucional, como o alcalde da cidade, Martiño Noriega, o presidente do Parlamento, Miguel Santalices, e outros membros da Mesa da Cámara e o delegado do Goberno, Santiago Villanueva, o reitor da Universidade de Santiago, Juan Viaño, ademais de familiares dos conselleiros.

No acto de toma de posesión, Alfonso Rueda falou en nome de todos os seus compañeiros, ao respecto do que recoñeceu o seu nerviosismo. Nas súas primeiras palabras tivo un recordo para os primeiros membros do Goberno de Feijóo de 2009 e todos aqueles que formaron parte do Consello da Xunta desde entón.

O PASADO NON VALE

Núñez Feijóo advertiu aos xa membros do seu goberno que "desde hoxe non valen os servizos prestados" ata agora, pero si adiantou un agradecemento polo labor dos dez membros do seu gabinete que está por vir. Fíxoo nun discurso no que tamén proclamou que o Goberno da Xunta "non lle pertence a ningunha sigla, nin ás persoas que o conforman" e, en consecuencia, "é Galicia a dona".

Feijóo, que prometeu xa en campaña electoral traballar desde o primeiro minuto se lograba renovar a súa terceira maioría absoluta, fixo gala deste compromiso outorgando apenas 15 minutos de 'descanso' aos conselleiros que este luns xuraron ou prometido o seu cargo antes de poñerse ao día cos retos que ten o Executivo na primeira reunión do Consello.