Os orzamentos "expansivos", primeiro exame do novo mandato

|


Dinerobilletesgalculadora


Os orzamentos do próximo ano 2017 supoñen o reto máis inmediato ao que se enfronta o Goberno que Alberto Núñez Feijóo nomeou este domingo e cuxos membros toman posesión este luns.

No que prevé que sexa o primeiro mandato expansivo desde que goberna, Feijóo decidiu axilizar ao máximo o calendario das contas, unha cuestión que tamén facilita o feito de que optase polo continuísmo no seu equipo, tendo en conta que os membros dos distintos departamentos autonómicos teñen perfiladas as súas cifras.

Se non cambia os seus plans, o presidente prevé que na primeira reunión na que o seu Executivo aprobe acordos --o vindeiro xoves, xa que o deste luns é, en principio, un encontro máis simbólico-- o teito de gasto quede listo para remitir ao Parlamento. Os orzamentos presentaraos en decembro e o obxectivo é que, se é posible, porque todo depende da tramitación na Cámara, entren en vigor en febreiro.

Á marxe dos orzamentos, no pasado pleno de investidura, Feijóo avanzou outros dous alicerces para a súa xestión: que sexa un mandato de "menos débeda" e "máis impostos". "Se hai máis folguras, seguiremos reducindo a presión fiscal sobre os galegos", prometeu Feijóo, quen tamén sitúa como debate clave, no ámbito estatal, a negociación do financiamento autonómico.

NO CÍRCULO DE PRÓXIMOS A FEIJÓO

Á fronte da Consellería de Economía, Emprego e Industria, Conde terá que traballar para "consolidar" a recuperación económica e afrontar a loita contra o paro. De feito, Feijóo prometeu unha nova Lei de emprego de Galicia, co obxectivo de que se creen entre 80.000 e 100.000 postos de traballo e que a taxa de paro se sitúe nunha cifra por baixo dos dous díxitos.

Dentro do "compromiso social" garantido polo seu xefe de filas, Román Rodríguez terá que afrontar os retos pendentes en Cultura, Educación e Ordenación Universitaria. A aposta polo FP, polos idiomas --así como potenciar o uso do galego entre os mozos-- e o ensino dixital, están entre as súas metas. Os populares apelaron, mesmo, a un gran pacto educativo coa oposición.


Na Sanidade, o reto principal de Jesús Vázquez Almuiña será o de controlar as listas de espera.


Rey Varela repite como conselleiro de Política Social, co reto demográfico pendente. Entre os compromisos xa asumidos, a ampliación da 'Tarxeta Benvida' --a axuda de 100 euros ao mes por bebé--, xunto con outras medidas para incentivar a natalidade.


PACTO POLO RURAL

Feijóo avanzou que esta debe ser a lexislatura "do sector primario" e unha das cuestións nas que tendeu a man e solicitou o apoio da oposición é o impulso do medio rural. Para logralo, apelou a un "pacto estable" á oposición e volveu a confiar a carteira da área a Ángeles Vázquez.

Unha ampla traxectoria profesional ligada ao sector pesqueiro favorece que Rosa Quintana continúe como conselleira do Mar. O presidente subliñou que, no que vai de ano, alcanzou unha cifra histórica de facturación por venda de peixe e marisco fresco: a mellor dos últimos 20 anos. "Consolidar esta melloría é o obxectivo da Consellería do Mar no próximos catro anos", decretou.

MATO, DIRIXENTE CON CARÁCTER

Xunto con Quintana e Alfonso Rueda, o principal peso político do Goberno e vicepresidente, Feijóo mantén a confianza desde 2009 en Beatriz Mato (1965), enxeñeira industrial. Dirixente con carácter, a conselleira de Medio Ambiente e Ordenación do Territorio ten ampla experiencia política.

O seu peso no PP da Coruña é incuestionable e nas quinielas previas a que Feijóo nomease ao seu goberno especulouse coa posibilidade de que abandonase a Xunta para centrarse na súa provincia coa vista posta nas eleccións municipais de 2019. Entre os retos que asume, a renovación da Lei de ordenación do territorio.

Cun perfil máis técnico que político ata que relevou a Agustín Hernández como conselleira, Ethel Vázquez continúa coa carteira de Infraestruturas e Vivenda. Nos niveis intermedios do seu departamento, Feijóo avanzou cambios notables. Por exemplo, a Axencia Galega de Infraestruturas asumirá os procesos de contratación e construción dos centros sociosanitarios e educativos.

Aínda que algúns dos seus compañeiros de partido apuntaban, sempre en privado, cando entrou no Executivo, que "politicamente" o cargo lle quedaba "grande", moitos cambiaron agora de opinión e cren que "foi facéndose coas rendas". Ademais, experimentou unha mellora notable á hora de comunicar as súas políticas.

relacionada Feijóo mantén o goberno no seu terceiro mandato
relacionada A oposición entende que a continuidade "contradí o propósito de abrir unha nova etapa"

Sin comentarios

Escribe tu comentario




No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Pressdigital
Plaza de Quintana ,3 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS LOS DERECHOS. EDITADO POR POMBA PRESS,S.L.
Aviso legal Cookies Consejo editorial Publicidad
Powered by Bigpress