A USC analiza o consumo enerxético dos seus edificios para reducilo un 30%

A Universidade de Santiago de Compostela (USC) está a levar a cabo un estudo para conseguir incrementar o aforro enerxético a través dun sistema de monitorización dos consumos dos edificios.

Esta semana, segundo informou a propia USC nun comunicado, reuníronse na capital galega un grupo de especialistas co obxectivo de "optimizar" os traballos na rede de sensores e no sistema de monitorización dos edificios do Campus Vida.

En concreto, o proxecto 'Life-Opere' está a empregar a residencia do Monte da Condesa como planta piloto, na que se están probando unha serie de sistemas de "xestión eficiente en redes enerxéticas, tanto térmicas como eléctricas".

A meta que persegue o proxecto é "reducir un 30 por cento os consumos enerxéticos asociados á xeración térmica e dun 35 por cento nas emisións de gases de efecto, así como obter un 35 por cento de aforro económico".

A iniciativa encadra na estratexia Europa 2020, que pretende diminuír "as emisións de gases invernadoiro nun 20 por cento, a mellora da eficiencia enerxética un 20 por cento e incrementar o uso de enerxías renovables un 20 por cento".