Manifestación no Carballiño para reclamar a absolución de Emilio Cao

|

Marchasdignidadeemiliocao


Unha manifestación percorre este sábado O Carballiño (Ourense) en apoio a Emilio Cao, o veciño deste municipio que foi detido nas Marchas da Dignidade en Madrid en 2014, co fin de reclamar a retirada de cargos e a libre absolución para un mozo ao que o fiscal pide cinco anos e oito meses de prisión.


O mércores, membros da Columna Galega das Marchas da Dignidade concentráronse na Praza do Obradoiro, en Santiago, para informar sobre a mobilización. Na pancarta que portaban podíase ler 'Non á represión. Todos somos Emilio Cao'.



DETENCIÓN NAS MARCHAS DA DIGNIDADE


O 22 de marzo de 2014, Emilio Cao, un mozo de 18 anos do Carballiño pertencente ao colectivo Estudantes sen Futuro, participou xunto a miles de persoas nas Marchas da Dignidade que confluíron en Madrid, onde foi detido, do mesmo xeito que preto dunha trintena de persoas --xunto a dous galegos máis--, acusado de cargos como agresión a un axente, que nega, no marco dos disturbios ocorridos.


O propio Emilio Cao, que se atopaba entre os presentes no Obradoiro este mércores, explica que "está á espera" de saber que ocorre co seu caso, xa que non lle chegou notificación "de cando" pode ser a apertura de xuízo, "nin de que maneira, nin en que lugar".


"O avogado di que non me preocupe, que non me vai a pasar nada, pero isto é unha ruleta", apunta este mozo, que agrega que: "Sempre tes a mosca detrás da orella, porque nunca sabes como se poden desenvolver os acontecementos".


"A pesar de todo, a pesar da represión e dos intentos inquisidores por parte do Estado de frear a mobilización popular, vou persistir e a seguir organizado politicamente", deixa claro Cao.


MANIFESTACIÓN


Os organizadores prevén que a manifestación sexa "masiva", pois consideran que "non hai solución sen mobilización".


Manolo Caamaño, un dos portavoces da Columna Galega das Marchas da Dignidade e membro da CUT, destacou que sairán á rúa "contra a represión que se está ensañando contra un veciño do Carballiño", "un compañeiro que simboliza a tolemia que representa o réxime pola vía represiva".


Tamén acudiu a dar o seu apoio a esta protesta a deputada de En Marea Eva Solla, quen demandou a "absolución das penas que se piden" a este mozo, á vez que cargou "contra a lei mordaza".


"Non imos tolerar nunca que unha montaxe policial ao final dunha manifestación, que foi totalmente pacífica, lle vaia a servir a estes represores, a estes Torquemadas do século XXI, para enchironar a un rapaz do Carballiño", sentenza pola súa banda Anxo Valladares (CXT).


Así mesmo, o Sindicato da Elevación pide a "liberación total" de Cao, á vez que indica que as liberdades "non poden estar limitadas por leis absurdas" que coartan a reivindicación de dereitos como "dignidade, pan e teito".

relacionada CCOO e UXT maniféstanse polo dereito á folga e contra a 'Lei mordaza'
relacionada Miles de galegos manifestáronse contra a precariedade laboral
relacionada El Congreso pide la derogación de la 'ley Mordaza'

Sin comentarios

Escribe tu comentario




No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Pressdigital
Plaza de Quintana ,3 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS LOS DERECHOS. EDITADO POR POMBA PRESS,S.L.
Aviso legal Cookies Consejo editorial Publicidad
Powered by Bigpress