​Activan unha campaña de control de xoguetes ante as compras de Nadal

O Instituto Galego de Consumo, que depende da Consellería de Economía, puxo en marcha unha nova edición da campaña 'Infonadal Consumo', que ten por obxectivo garantir a seguridade dos produtos e protexer os dereitos dos consumidores ante as compras de Nadal.

A través desta iniciativa refórzanse as actuacións de control do mercado que realizan durante todo o ano de forma coordinada a inspección de Consumo e o Laboratorio de Consumo de Galicia, á vez que se achega información e formación en materia de consumo responsable pensada de maneira especial para estas datas a través da Escola Galega de Consumo, con charlas nas que está prevista a participación de máis de 1.000 persoas.

Os controis neste marco céntranse nos xoguetes e, entre eles, os destinados a menores de tres anos, aqueles con ventosas, os peluches e as guirnaldas.

Consumo pretende garantir "ao máximo" a protección dos consumidores nunha época na que se incrementa a venda de produtos para os máis pequenos. A inspección de Consumo encárgase de tomar as mostras no mercado, que posteriormente se envían ao Laboratorio de Consumo de Galicia, o único oficial público acreditado pola Entidade Nacional de Acreditación (ENAC) para a análise deste tipo de produtos.

No caso de que se constate que algún destes produtos presenta riscos, procédese a notificar á rede de alerta de produtos de consumo non alimenticios, un sistema de información que funciona no ámbito estatal e europeo e que permite a rápida adopción de medidas de reacción coordinadas para garantir a seguridade dos consumidores, como a inmovilización do produto, a retirada do mercado ou a modificación daquelas características que o converten en inseguro.

Por outra banda, o Instituto Galego de Consumo tamén intensifica a vixilancia no cumprimento das obrigacións dos establecementos que poñen os seus produtos a disposición dos consumidores: indicación de prezos, etiquetaxe, publicidade ou existencia de follas informativas.