​O Dépor ensaia a porta pechada o partido fronte ao Osasuna

Estadio de Riazor, cheo nun partido de Liga. //Fonte: RC Deportivo

Os últimos encontros deixaron boas sensacións dentro do cadro do Dépor, que segue confiando en remontar a situación. E qué mellor ca encarar as vacacións de Nadal con tres puntos máis na clasificación.

Con iso en mente, o Deportivo ensaiou esta mañá no Estadio de Riazor, nunha sesión a porta pechada, o partido do domingo 18 de decembro ante Osasuna, que se xogará ás 6 e media da tarde.

Así, Gaizka Garitano traballou cos seus xogadores a saída de balón, defensa en inferioridade, a posesión e o xogo por bandas e remate, tal e como informa o club a través da súa web. Un partido once para once puxo o punto e final ao traballo sobre o céspede.

Está fóra do grupo Laure. Os fabrilistas Óscar e Nacho Monsalve adestraron hoxe co primeiro equipo. O venres os futbolistas branquiazuis volven estar citados en Abegondo ás 10.30 horas.

COPA ÁFRICA

Un efectivo que pode botar en falta Garitano é Fayçal Fajr, que foi preconvocado pola Selección de Marrocos para disputar a Fase Final da Copa de África. O torneo xogarase en Gabón do 14 de xaneiro de 2017, día en que arranca a fase de grupos, até o 5 de febreiro, coa disputa da grande final.

Nos próximos días, a Federación Marroquina de Fútbol comunicará a listaxe definitiva. En caso de ser convocado, Fayçal debe incorporarse á concentración do equipo nacional o próximo 28 de decembro. Como mínimo, quedaría ata o 24 de xaneiro, o día que Marrocos xoga o último partido da fase de grupos.