Ata 120 euros se pagaron por facerse cun dos afamados capóns de Vilalba

A concelleira de Feiras e Mercados do Concello de Vilalba, Chery Grandío, calculou que na Feira do Capón que se celebrou o domingo se puxeron á venda sobre 700 unidades.

O evento, que conta xa con 200 anos de antigüidade, representa unha tradición no municipio que conta cunha "gran afluencia de xente" e "48 ou 49" dos sesenta criadores censados neste concello.

Chery Grandío descoñece o volume de negocio que xerado, aínda que adiantou que a venda por unidade oscila "entre os cen e os 120 euros".

A concelleira de feiras destacou o capón como "un embaixador de Vilalba polo mundo enteiro", á vez que describía que se crían "con moito mimo" e a súa alimentación faise "a base de millo, patacas".

"No mes de novembro métense nas capoeiras. A cría faise cos mellores coidados e logo no sacrificio tense en conta que vaian preparados, ben limpos e amarelos. É un manxar excelente", detallou.