​Animalistas denuncian a colocación de cepos a cabalos no monte Aloia

A Asociación Animalista Libera! e a Fondation Franz Weber denunciaron o uso de cepos en dous cabalos que foron localizados no parque natural do monte Aloia, no municipio pontevedrés de Tui.

Tal e como indicaron, froito da colaboración cidadá souberon que dous cabalos que se atopaban nas zonas verdes da contorna natural tudense levaban as coñecidas popularmente como 'trancas', uns dispositivos que inmobilizan as patas dos animais para limitar os seus movementos.

Estes colectivos lembraron que utilizar "calquera artefacto" para inmobilizar a seres vivos "é unha conduta de malos tratos animais continuados", que pode ser constitutiva dun delito penado con ata dous anos de prisión e a prohibición de tenencia, comercio ou profesión relacionada con gando durante ata 36 meses.