#Claves de la semana

​Abre ao tráfico o primeiro tramo da vía rápida do norte de Lugo

Permitirá que polo centro de Xove deixen de pasar uns 200.000 camións cada ano, segundo as estimacións. Falta acordo para avanzar na variante de Viveiro.


|

Feijooviarapida


O presidente da Xunta inaugurou este martes o primeiro tramo da Vía de Alta Capacidade (VAC) do norte de Lugo, o que discorre entre Xove e Viveiro, nun acto no que se comprometeu a "chegar a acordo" para desbloquear a variante de Viveiro, "o punto negro máis importante" do trazado, segundo o rexedor de Xove.


Durante a inauguración, Núñez Feijóo lembrou que esta "esperada" infraestrutura supón "un paso importante na conectividade do norte da provincia de Lugo co resto da Comunidade" á vez que promove "a vertebración e a conectividade da Mariña Lucense".


Sobre a execución, apuntou que foi "francamente complicada", con numerosos "viadutos, ligazóns e pasos superiores e inferiores". "Foi unha construción difícil e custosa", sinalou o presidente galego, que admitiu que "inicialmente estaba previsto que non fose tan ambiciosa desde o punto de vista orzamentario", cun investimento de 50 millóns de euros.


Esta nova infraestrutura, subliñou, permitirá "mellorar a seguridade viaria de forma notable" e será unha "alternativa segura e cómoda, sen casas e sen peóns" ás vías tradicionais da Mariña. Con iso, á vez que se mellora a seguridade viaria, posibilitarase "devolver" aos cidadáns os centros e rúas das localidades.


Como exemplo, Núñez Feijóo apuntou que este tramo permitirá que polo centro de Xove deixen de pasar 200.000 camións anuais, o que supón "un antes e un despois para a vida da localidade".


VARIANTE DE VIVEIRO


Feijóo garantiu o compromiso da Xunta coa Mariña Lucense e de continuar as obras "cara á Coruña". Para iso, recoñeceu, a gran dificultade agora desta vía é Viveiro", cuxa variante aínda non conta cun trazado de consenso.


"A Variante de Viveiro ten que ser o próximo obxectivo da Xunta", dixo o presidente, que se comprometeu a presentar un novo trazado "que represente para todos unha solución" e que permita "chegar a acordo".


Durante o acto de inauguración, o alcalde de Xove, Demetrio Salgueiro, lembrou que esta infraestrutura para a Mariña é unha "demanda histórica" e unha "necesidade" para "unha das comarcas con máis potencial económico da provincia".


A ALCALDESA DE VIVEIRO PLANTA A FEIJÓO


A alcaldesa de Viveiro, a socialista María Loureiro, xustificou este martes a súa ausencia do acto de inauguración dun tramo da corredor Costa Norte coa presenza do presidente do Executivo autonómico, Alberto Núñez Feijóo, ao "impoñer" a Xunta o dito trazado "sen estar consensuado nin cos veciños, nin co grupo" de goberno local.


Por iso, en palabras da rexedora, esta ausencia prodúcese "para mostrar" o seu "descontento dos temas importantes do Concello de Viveiro que están parados". "E -engade- un deles é parte do trazado que van inaugurar hoxe e que forma parte dun amplo proxecto que contempla a vía de alta capacidade de Viveiro que nin se ve, nin se espera", lamentou.


María Loureiro lembra que "en 2010" a Xunta "impuxo un trazado novo sen estar consesuado nin cos veciños, nin co grupo municipal". "E desde aquela non recibimos ningunha noticia. A Viveiro non se lle está tratando ben, non vou inaugurar un tramo de oito quilómetros que tardaron oito anos", sinalou.


Respecto diso, comentou que esa vía de "alta capacidade" é "fundamental", á vez que obxectou que Viveiro "é o único concello da Mariña que non ten un corredor". "Todos os camións pasan polo centro, non temos unha variante alternativa e é o terceiro concello máis importante da provincia", lamentou.

relacionada O Corredor do Morrazo volve pechar este luns entre Rande e Meira
relacionada Abre a media autovía da Costa da Morte
Última hora

Sin comentarios

Escribe tu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.
Última hora
Cabeceralomasleido 1
Cabecerarecomendados 1

Galiciapress
Plaza de Quintana, 3 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS LOS DERECHOS. EDITADO POR POMBA PRESS,S.L.
Aviso legal - Política de Cookies - Política de Privacidad - Configuración de cookies - Consejo editorial - Publicidad
Powered by Bigpress
CLABE