Só o 37% dos convenios colectivos de sector galegos contén algunha referencia á dixitalización

O de verbenas, por exemplo, inclúe a prohibición de uso non autorizado de redes sociais durante a actuación e ensaios

Só o 37% dos convenios colectivos de sector galegos contén algunha referencia a aspectos relacionados coa dixitalización, "de moi diversa natureza e intensidade", segundo recolle un informe do Consello Galego de Relacións Laborais.

En concreto, o documento, elaborado polo catedrático de dereito do traballo José María Miranda Boto e os profesores Henar Álvarez Custa, Lida Gil Otero e José Manuel Pazó Argibay, analiza os 122 convenios en vigor en Galicia a 6 de febreiro de 2025, e establece que 45 conteñen "algunha referencia" á dixitalización.

"Esta proporción, aínda que recente, segue sendo baixa, o que reflicte unha escasa penetración da transformación dixital na negociación colectiva galega", advirte.

Na presentación este xoves, a presidenta do Consello Galego de Relacións Laborais, Antía Sández Callejo, e a decana da facultade de dereito da Universidade de Santiago de Compostela (USC), Ana María Gude Fernández, destacaron a "enorme utilidade" do estudo.

"MOITO POTENCIAL"
Pola súa banda, o catedrático de dereito do traballo José Miranda Boto resaltou que hai "moito potencial" para incorporar cuestións relativas á dixitalización nos convenios en Galicia, relativas a organización do traballo, formación, clasificación profesional, riscos laborais e protección de datos, entre outras.

Respecto diso, citou exemplos como o convenio de comercio de alimentación da provincia da Coruña e o do metal de Lugo, ou o de orquestras de verbenas de Galicia, que regula como falta grave "o uso, non autorizado, dos medios de comunicación e/ou informáticos, redes sociais propias e de calquera outra índole, por exemplo Whatsapp/Facebook/Twitter... durante a actuación e ensaios".

TELETRABALLO, ALGORITMOS E DESCONEXIÓN
Xunto ao director do informe, a doutora de dereito do traballo Lida Gil Otero abordou as posibilidades da negociación colectiva en ámbitos como o teletrabajo, tendo en conta que só tres convenios galegos 'tocan' este punto e fano "recollendo o que di a lei", e os algoritmos.

Por último, o tamén doutor de dereito do traballo José Pazo Argibay profundou na desconexión dixital e como podería introducirse nos convenios colectivos de Galicia.