O temporal amainará o martes pero volve cortar a autovía Pontevedra-Marín

A subida do mar alimentada polas fortes e constantes choivas obrigou este luns a cortar de novo a autovía PO-11, principal conexión entre Marín e Pontevedra, despois de que as ondas invadisen os carrís á altura de Praceres. A borrasca Leonardo, que golpea a Galicia con ventos de máis de 120 km/h e marusías de até seis metros, deixou cortes de tráfico, rutas marítimas suspendidas e o plan INUNGAL activado por risco de inundacións.

O tramo entre Pontevedra e Marín da autovía PO-11 volveu pecharse ao tráfico este luns pola tarde debido á forte ondada que, coa subida da marea, volveu cubrir a calzada. A Garda Civil tivo que cortar a vía ás 14.50 horas, coincidindo coa pleamar prevista para as 16.40. Pola mañá, a mesma estrada xa permanecera pecha durante varias horas até a súa reapertura temporal pouco antes das 11.00.

Os equipos de Protección Civil, Garda Civil e Policía Local traballaron durante toda a xornada para achicar a auga acumulada e garantir a seguridade. A Dirección Xeral de Tráfico (#DXT) habilitou desvíos pola PO-546 —a antiga estrada de Marín— e pola VG-4.4, que conecta coa AP-9 e a PO-10. Desde a Xunta apelouse aos condutores a extremar as precaucións e evitar desprazamentos innecesarios, especialmente durante as horas de pleamar.

O 112 Galicia confirmou que a autovía foi pechada en ambos os sentidos mentres as unidades de emerxencia trataban de drenar a auga dos catro carrís. A inundación provocou importantes retencións nos accesos a Pontevedra e obrigou a reorganizar o tráfico nas inmediacións do porto de Marín.

A borrasca Leonardo tamén afectou o servizo marítimo entre Ou Morrazo e Vigo. A naviera Pirata de Nabia suspendeu as primeiras saídas do día —entre as 6.30 e as 8.30 desde Moaña, e entre as 7.00 e as 9.00 desde Vigo— debido ás condicións do mar. Pola súa banda, Mar de Ons reduciu a frecuencia das rutas entre Cangas e Vigo, operando só cada media hora durante a mañá para adaptar a navegación ao forte vento e ondada.

Nesta xornada, Galicia permaneceu baixo aviso laranxa por temporal costeiro decretado pola Axencia Estatal de Meteorología (AEMET). Rexistráronse ventos de compoñente suroeste de forza sete ou oito e ondas de cinco a seis metros, especialmente nas Rías Baixas. A situación levou á Dirección Xeral de Emerxencias e Interior a manter o Plan INUNGAL en fase de preemerxencia, con especial vixilancia sobre ríos das provincias da Coruña, Pontevedra e Ourense.

En Pontevedra, as canles en seguimento son os de Cabeiro (Redondela) e Galo (Cuntis), onde as precipitacións acumuladas poderían provocar novos desbordamentos. Na costa coruñesa, o mar de fondo chegado do Atlántico superou os seis metros nalgúns puntos do litoral entre Fisterra e A Costa da Morte.

Segundo os rexistros de Meteogalicia, o vento alcanzou este luns 126,7 km/h en Oia, na comarca do Baixo Miño, e 125,3 km/h en Vimianzo (A Coruña). No interior, municipios como Fornelos de Montes acumularon até 51,9 litros por metro cadrado de auga, mentres que en Baiona se rexistraron 48,5 litros.

As temperaturas tamén mostraron unha alta variabilidade: Caldos de Randín (Ourense) caeu até os 2,3 ºC á primeira hora, mentres que en Marín (Pontevedra) o termómetro alcanzou os 16,3 ºC durante a madrugada. Estas diferenzas responden á masa de aire tépedo asociada a Leonardo , que contribuíu a intensificar o contraste térmico e a inestabilidade atmosférica.

A Xunta lembrou a necesidade de seguir as recomendacións de seguridade ante os avisos de nivel laranxa que permanecerán activos até o martes pola noite nos litorais da Coruña e Pontevedra. Espérase que a situación mellore a partir do mércores, cando a borrasca se desprace cara ao Cantábrico e diminúa a intensidade do vento e as precipitacións.

A previsión apunta a máis choivas e mesmo neve

Para o martes, a AEMET prevé ceos nubrados ou cubertos en toda Galicia, con probables néboas dispersas en zonas altas. Haberá precipitacións xeneralizadas, máis persistentes e intensas na metade occidental e en Ourense, onde poderían ir acompañadas de tormenta. 

A partir do mediodía, a choiva podería ser en forma de neve por encima dos 1.000 metros. Meteogalicia pola súa banda rebaixa a cota de neve aos 900 metros en Lugo.

As temperaturas descenderán, sobre todo as mínimas, e espéranse xeadas débiles nas montañas ourensás. O vento soprará do sur e suroeste, con refachos moi fortes no litoral atlántico que irán amainando pola tarde.

Iso si, a diferenza de hoxe luns, mañá martes non hai alertas de AEMET por choivas para zonas terrestres. Si hai alertas amarelas por temporal marítimo en todo o país.  Si hai aviso amarelo por neve nas comarcas máis altas de Ourense e Lugo.

O mesmo sucederá o mércores. É dicir, seguirá chovendo e facendo mal tempo, pero non tanto como estes dous últimos días.

Así o mércores manterase a inestabilidade atmosférica, con ceos cubertos e choivas débiles ou moderadas, máis persistentes no interior. Non se descartan episodios de tormenta. A cota de neve subirá rapidamente de 1.200 metros na madrugada, sen esperar máis nevadas durante o día. As temperaturas experimentarán un lixeiro ascenso, máis notable no interior de Pontevedra, mentres que os ventos seguirán sendo do suroeste, con posibles refachos moi fortes en zonas expostas do litoral.