A Orquestra Sinfónica de Galicia ofrece este sábado na Coruña un concerto na praza de María Pita

A Orquestra Sinfónica de Galicia (OSG) ofrecerá este sábado un concerto na praza de María Pita, da Coruña, acompañada polo seu Coro, o Coro Novo e os Nenos Cantores do conxunto orquestral.

A Sinfónica interpretará, nun concerto que terá lugar ás 20,30 horas e para o que a entrada será libre até completar o aforamento, "a cantata profana 'Carmina Burana', de Carl Orff, unha das pezas favoritas do público pola súa forza e variedade rítmica e coa que a agrupación orquestral realizou a súa primeira gran xira por Alemaña en 1998".

Ademais do Coro, o Coro Novo e os Nenos Cantores da OSG, participará tamén a soprano Raquel Lojendio, o contratenor Carlos Mena e o barítono Javier Franco como solistas, todos baixo a dirección de Dima Slobodeniouk.

'Carmina Burana' é unha cantanta escénica profana, composta por Carl Orff entre 1935 e 1936 e estreada en 1937, que utiliza como textos algúns cantos escritos en latín medieval, alto alemán medio e provenzal antigo dos séculos XII e XIII.