Expulsan a 54 persoas e comisan 137 quilos de ameixa nun operativo en Ferrol

Santiago.-18/04/2015

Axentes do Servizo de Gardacostas, en colaboración con axentes da Policía Autonómica, realizaron onte un operativo contra o furtivismo na zona interna das Pías, na ría de Ferrol, que se saldou coa expulsión de 54 persoas que estaban pescando de xeito ilegal e coa identificación de 9 delas.

Nesta actuación os axentes comisaron 137 quilos de ameixa babosa de talla antirregulamentaria (cun prezo estimado no mercado que superaría os 2.200 euros), 4 raños e 4 táboas de poliestireno.

A Consellería do Medio Rural e do Mar lembra á cidadanía que o consumo de marisco extraído e comercializado de xeito ilegal pode supor un risco para a saúde ao non ter pasado ningún tipo de control que o avale. Por iso pide ao consumidor que non compre produto fóra das vías legais de comercialización.