O 'dinoseto' de Vigo contará cun 'photocall' para evitar a súa deterioración

O Concello de Vigo está a rehabilitar o arbusto podado con forma de dinosauro, máis coñecido como 'dinoseto', posto que como "as fotos son tantas" e "é unha planta moi sensible", ten partes danadas. Ademais, para evitar a súa deterioración, estase a formular habilitar "unha especie de photocall" onde a xente poida facer fotos.

O alcalde, Abel Caballero, así comunicouno nunha rolda de prensa este luns, na que comentou que o 'dinoseto' --que é "dinoseta, é femia" -- "non" se quere "ir de ningún modo" da súa situación actual, na Porta do Sol. Ademais, avanzou que é "altamente probable que nun tempo vaia poñer un ovo e haxa un dinosetitopequeno ou unha dinosetita pequena".

O rexedor, que considerou que este tema "é unha broma colectiva que agrada a todos", reparou en que este arbusto é "o máis fotografado en Vigo dende a árbore de nadal en toda a historia da cidade".

Así as cousas, indicou que o 'dinoseto' "se deteriorou un pouco" pola cantidade de fotos que se fai a xente con el, onde os cidadáns non só se soben á herba da parte de abaixo, senón que tamén xurdiu unha "moda perniciosa de subir enriba do propio arbusto".

"É unha planta moi sensible e isto danouna, e nunha parte do lombo víase a armazón metálica", recoñeceu o mandatario, quen sinalou que se están a facer traballos para que quede recuberto e para que se lle vexan os ollos.

Nesta mesma liña, Caballero dixo que se vai buscar un sistema "que polo menos sinale que non convén subir ao 'dinoseto'. Ademais, intentarase habilitar "unha especie de photocall, un lugar onde facer fotos que non deteriore o céspede".