O prazo para presentarse os premios da XI Bienal de Pintura do Eixo Atlántico finaliza o luns 28

O prazo de inscrición para participar na XI Bienal de Pintura do Eixo Atlántico e optar a algún dos seus catro premios e integrar o catálogo dunha das exposicións pictóricas itinerantes máis importantes da península ibérica finaliza o vindeiro luns, día 28.

A convocatoria está aberta á participación de autores naturais ou residentes na Eurorrexión Galicia Norte de Portugal. Os creadores interesados no certame, ó que deberán presentar unha obra orixinal e inédita, deberán inscribirse na web do Eixo Atlántico http://www.bienalpinturaeixoatlantico.com/.

A organización transfronteiriza Eixo Atlántico, que puxo en marcha esta bienal hai 20 anos para impulsar a creación e os novos talentos de Galicia e do Norte de Portugal, repartirá 7.500 euros en premios. O primeiro galardón outorgarase á mellor obra do certame (3.000 euros), e os dous segundos á mellor obra de autor galego (1.500 euros) e á mellor obra de autor portugués (1.500 euros). Ademais, concederase o galardón ‘Novos Talentos Luso-Galaicos’ para artistas de idades comprendidas entre os 16 e 25 anos (1.500 euros).

Un xurado formado por personalidades relacionadas co mundo da cultura e das artes plásticas de Galicia e Portugal, así como polo gañador da edición anterior, procederá a fallar os premios entre unha selección dun máximo de 30 obras, que constituirán o catálogo itinerante da XI Bienal.

O programa, un dos máis queridos e máis exitosos dos que puxo en marcha o Eixo Atlántico, non só fortaleceu os lazos artísticos entre Galicia e Norte de Portugal senón que actuou como xerador de actividade económica, tanto pola atracción de visitantes ós municipios que acollen a mostra como facilitando a inserción laboral dos novos talentos.

Na Bienal de Pintura colaboran co Eixo Atlántico, a Secretaría Xeral de Cultura e a Dirección Xeral de Xuventude e Voluntariado da Xunta de Galicia, a Fundação da Juventude e os municipios asociados ó Eixo.