Descenden os residentes en Galicia con dereito a voto o 20-D

Un total de 2.705.830 galegos están chamados a votar o 20 de decembro, 17.031 máis que nas eleccións xerais de 2011, cando polas catro circunscricións galegas podían acudir ás urnas 2.688.799 persoas. 

O número de persoas censadas en Galicia diminúe con respecto ás anteriores xerais, aínda que aumentan os galegos con dereito a voto que residen noutros países, segundo datos divulgados este luns polo Instituto Nacional de Estadística (Ine).

Nas eleccións do próximo 20 de decembro figuran inscritos nas estatísticas do Ine un total de 2.265.812 electores residentes nas catro provincias, aos que hai que engadir 440.018 galegos residentes no estranxeiro.

Nos comicios municipais de maio pasado estaban censadas en Galicia un total de 2.284.763 persoas e nas xerais do 20 de novembro de 2011 había 2.306.922 votantes.

Nos últimos comicios xerais estaban convocados ás urnas un total de 2.688.799 galegos con dereito a votar, dos cales 381.877 están incluídos no censo de residentes no estranxeiro.

De acordo con esas cifras, comparativamente cos últimos comicios xerais de hai catro anos, o censo de persoas residentes en Galicia diminuíu en 1,7 % e o de galegos residentes no estranxeiro aumentou en 13,4 %.

O Ine subliña no comunicado que o censo pode ser consultado desde este luns ata o 9 de novembro e advirte de que "os electores residentes no estranxeiro que desexen votar deberán solicitar o seu voto ata o 21 de novembro".

Na Coruña son 936.705 as persoas con dereito a voto, mentres que os residentes estranxeiros por esta provincia son 152.115. En Lugo son 286.322 e 63.210, respectivamente. En Pontevedra, o primeiro grupo suma 775.061 persoas e o segundo, 126.905, mentres que en Ourense poderán votar 267.724 cidadáns residentes na provincia e 97.788 no estranxeiro.