O xulgado do accidente de Angrois asume o caso das monxas retidas

Tras pechar a instrución da causa polo accidente de Angrois co maquinista como único imputado, o Xulgado de Instrución número 3 de Santiago, que capitanea Andrés Lago Louro, será o encargado de investigar a suposta retención de tres monxas de orixe india nun convento de clausura de Santiago.

Segundo informou este xoves o Tribunal Superior de Xustiza de Galicia (TSXG), o Decanato dos xulgados de Santiago fixo durante esta xornada o sorteo da causa entre os xulgados de instrución, tras recibir un último informe pendente. Esta repartición faise dado que os feitos que se investigan ocorreron nun momento indeterminado.

Agora que a causa xa está repartida é o momento de que a Fiscalía mova ficha e decida se actúa de oficio, xa que as relixiosas supostamente detidas decidiron non presentar denuncia. O novo xuíz instrutor deberá decidir, ademais, se chama a declarar como investigado a algún responsable da congregación.

Nun primeiro momento levou a investigación o Xulgado de Instrución número 1 de Santiago, a cargo de Ana López-Suevos, que realizou as primeiras dilixencias tras recibir unha denuncia que informaba de que varias monxas de orixe india estaban retidas nun convento de clausura de Santiago.

López-Suevos enviou o sábado a unha comitiva xudicial da Policía Nacional ao convento das Mercedarias de Santiago para pedir entrevistarse coas monxas supostamente retidas e tomou declaración a cinco delas, que lle manifestaron o seu desexo de abandonar o convento.