Galicia reclamará en Madrid a titularidade da AP-9

O Parlamento de Galicia conseguiu un nivel de consenso pouco habitual este martes, cando todos os grupos acordaron por unanimidade reclamarlle ao goberno central que se traspase a Galicia a titularidade da AP-9. 

Os deputados do PPdG, Jesús Goldar, do PSdeG Raúl Fernández e do BNG Ana Pontón serán os encargados de viaxar a Madrid para defender no Congreso dos Deputados esta reclamación do hemiciclo galego, aprobada a proposta do BNG. 

O debate sobre esta cuestión data de setembro de 2015 e acadou o seu penúltimo chanzo o pasado 4 de marzo, coa a aprobación en comisión parlamentaria do texto impulsado do BNG. A única condición que puxo o PP foi eliminar as referencias críticas á xestión do Goberno Central a través dunha enmenda aprobada co único respaldo da súa maioría absoluta. 

Nese momento o texto foi aprobado entre chamamentos dos grupos para manter o compromiso de voto no Congreso dos Deputados, non sería a primeira vez que o Parlamento de Galicia reclama unánimemente unha transferencia (como ao de Tráfico) para vela rexeitada en Madrid por parte do PP e do PSOE. 

AGRAVIO PARA OS GALEGOS

Pese a que todos os grupos apoiaron a reclamación da titularidade, non todos se amosaron igual de críticos coa xestión do Goberno central. Para o bloque e para AGE, a autoestrada é o símbolo do agravio para os galegos", en palabras de Ana Pontón, e unha "ultraxe", como definiu o deputado de Alternativa Juan Fajardo. 

"É un paso adiante para acabar con este agravio; defendemos poder ter capacidade para decidir sobre os asuntos que nos afectan neste país. Hai que acabar coa xestión que fixo o Goberno do Estado, que sempre foi contraria aos intereses dos galegos", argumentou Ana Pontón, quen criticou que as peaxes que se cobran son "un imposto á circulación" neste país, "inxusto, regresivo e un lastre para o desenvolvemento" de Galicia..

Fajardo, pola súa banda lembrou que unha viaxe como entre Caldas de Reis e Santiago son 7,10 euros ida e volta ao día, e pode "significar o 20 por cento dos ingresos dunha familia". Tamén puxo o exemplo de que entre Tui e A Coruña son 17,85 euros de peaxe: "É máis barato ir a Frankfurt desde A Coruña", lamentou, en referencia a unha tarifa de 14,95 euros dunha aerolínea low cost.