​Entidades sociais tratan de asentar a X solidaria en Galicia

Varias entidades sociais acaban de estrear unha campaña coa que pretenden concienciar aos galegos que non marcan a casa destinada a fins sociais da declaración da renda.

O ano pasado un 46,8% de galegos non tacharon nin a casa destinada á igrexa nin á que se deriva a asociacións sociais. Unha situación que pretenden cambiar dende a Rede Galega de Loita contra a Pobreza (EAPN-Galicia), a Coordinadora Galega de ONGD e Cermi-Galicia.

En 2015 as entidades sociais conseguiron 15,1 millóns de euros para financiar as súas actividades. Pero se todos os galegos que fixeron a declaración tiveran marcado a casa de fins sociais poderían ter conseguido 11,5 millóns máis, chegando a un total de 26, 6 millóns.

Por iso quixeron facer un chamamento á sociedade, recordando que marcar esta casa non implica pagar máis impostos nin que se devolva menos diñeiro: é simplemente unha forma de indicarlle ao Estado cómo prefire utilizar o 0,7% do IRPF.

O presidente de EAPN-Galicia, Antonio Hernández Fernández, recorda ademais que os cartos conseguidos marcando esta casa irán "integramente destinados a programas e persoas en risco de exclusión".