O vicepresidente da Xunta non conta cun adianto electoral

O vicepresidente da Xunta non conta cun adianto electoral. Alfonso Rueda considera que é necesario defender "o valor da estabilidade" e dá por feito que esa "estabilidade" chegará en Galicia "ata o mes de outubro".

Así o dixo ao ser preguntado sobre a potestade do presidente da Xunta, Alberto Núñez Feijóo, actualmente en visita oficial en distintos puntos de Sudamérica, de adiantar a data das eleccións galegas e de facelas coincidir cunha eventual repetición das xerais.

A este respecto, indicou que "todo parece" indicar que tocará unha nova chamada ás urnas e salientou que é o que se percibe desde hai "un mes ou dous" á vista de "como se comportaron os perdedores das eleccións" tras as súas distintas reunións. Con todo, proseguiu Rueda, en Galicia existe "estabilidade" e "chegará ata o mes de outubro".

O argumento da "estabilidade" tamén foi blandido esta mesma semana polo propio mandatario para descartar que vaia a facer coincidir ambos comicios no mes de xuño. "Eu creo no valor da estabilidade política, un activo económico e social. E a folla de ruta é a de seguir aplicando esa estabilidade", subliñou o pasado luns.