Podemos non forzará a saída de Carmen Santos: "non nos corresponde intervir"

O secretario xeral de Podemos, Pablo Iglesias, restou importancia ás tensións internas xeradas no seo da dirección do partido en Galicia, e afirmou que desde a dirección estatal non teñen intención de "intervir" nun "debate" que deben ter os galegos.

"É unha cousa normal que no marco dos órganos de dirección dos territorios poida haber diferenzas de criterios, pero non nos toca valoralo a nós", afirmou en declaracións no Congreso, ao ser preguntado polas tensións creadas por mor de que unha maioría do Consello Cidadán galego forzase un posicionamento sobre o camiño para seguir para as eleccións autonómicas deste ano, que terán lugar no outono.

Sobre a posibilidade de que a dirección de Galicia force a saída da secretaria xeral, Carmen Santos, elixida fai apenas tres meses tras a destitución do seu antecesor e a celebración dunhas primarias internas nas que gañou á deputada electa Ángela Rodríguez, Iglesias avisou de que "os inscritos de Podemos xa votaron os seus representantes" e é a eles aos que lles corresponde dirimir que queren. "A nós non nos corresponde intervir", salientou.

A propia secretaria xeral galega asegurou este xoves que "non entra" na súa "predicións" que o Consello Cidadán Autonómico (CCA) force a súa saída con dimisións que deixen sen quórum este órgano de decisión, como lle ocorreu ao seu predecesor no cargo, Breogán Riobóo.

Santos, que perdeu a maioría coa que contaba no Consello Cidadán ao apoiar un camiño distinto dúas das conselleiras que se presentaron na súa lista, defendeu que, "en principio, non se contempla ese xiro, cando no que hai estar a pensar é nesa cidadanía que está aí fóra, e nos seus problemas e non en procesos internos".