​A loita contra incendios sumará en agosto catro helicópteros

Ángeles Vázquez, na base de helicópteros.

A Xunta contará con catro helicópteros contra o lume desde agosto, despois de que a adxudicación de cinco avións para a campaña de alto risco queda deserta a finais de xuño.

En concreto, un dos helicópteros irá á base de Valdeorras (Ourense), despois de que a CIG denunciase o "abandono" deste centro operativo, ao non contar con ningún medio aéreo.

Diso informou este mércores a conselleira de Medio Rural, Ángeles Vázquez, nunha visita á base de Vilamaior, no municipio de Verín, na que sinalou que, en agosto, incorporaranse esas catro aeronaves para reforzar o operativo.

Na súa visita, a conselleira coñeceu o persoal da base de Vilamaior e agradeceulles o labor realizado. Ademais, apelou á colaboración da cidadanía ao comunicar os incendios e a presenza dos posibles autores deles mediante o teléfono gratuíto 085.

MÁIS DE 170 HECTÁREAS EN MONTERREI

Posteriormente, Ángeles Vázquez desprazouse ao Concello de Monterrei para ver os terreos afectados polo lume na parroquia de Vilaza, que se declarou como controlado desde este domingo pola noite.

O incendio afectou a unha superficie de máis de 170 hectáreas, e na súa extinción traballan un técnico, 32 axentes, 47 brigadas, 27 motobombas, sete pas, oito helicópteros e seis avións.

A conselleira falou cos veciños afectados por este incendio e solidarizouse con eles. Ademais, agradeceu o seu labor ao brigadista que permanece ingresado no Complexo Hospitalario Universitario da Coruña (Chuac), debido ás queimaduras do incendio rexistrado en Ribas de Sil (Lugo).