​Ana Pontón: “A especialidade do BNG é Galicia”

A candidata do BNG á Presidencia da Xunta, Ana Pontón, evitou "facer de comentarista das leas" doutras formacións políticas porque considera que isto "beneficia a Feijóo" e porque impide que se escoiten as alternativas ás políticas do Partido Popular.

Así o expresou este sábado antes de reunirse cos membros das candidaturas do Bloque antes das eleccións do 25 de setembro para "preparar o esprint final antes da campaña". Ademais, lembrou que "o único que lle preocupa" é a situación que deixa a política do PP, a cal incrementou "case un 30 por cento" a pobreza e deixou "a máis de 70.000 persoas vivindo con menos de 600 euros ao mes".

Así mesmo, resaltou que "a especialidade do BNG é Galicia" e que é a única forza que defende "a súa capacidade, autogoberno e que quere que dun paso cara a adiante". Para iso, apostou por "mirar cara a Galicia" e non "para Madrid", tal e como o fixeron os nacionalistas "historicamente". 

Entre os obxectivos principais antes do encontro coas urnas, a candidata sinalou a necesidade de demostrar "a todas esas persoas desganadas coa política" que o BNG pode dar "solución aos problemas da xente". "Que vexan que hai solución despois do que pasou a nivel estatal, onde o PP e Cidadáns impoñen un programa de dereitas sen que haxa ningunha outra alternativa", lamentou.

PROPOSTAS DO BNG

Doutra banda, Pontón apuntou a que a política autonómica está nun momento "que non necesita parches", senón "un proxecto de país". Neste sentido, indicou que o BNG é unha organización "con historia" e con "capacidade para xestionar e para impulsar os cambios que se necesitan".

Ao fío diso, indicou que Galicia "non é unha xestoría na que se pode cambiar uns xestores por outros". "Necesítase abrir unha nova etapa política e temos tres candidatos que están a defender o mesmo marco", reivindicou. Segundo Pontón, a Constitución e o Estatuto "é un traxe que queda axustado a Galicia", e o necesario é "dar un paso" para poder dar solución aos problemas da comunidade.

Pontón asegurou que é imposible que haxa unha política "seria e real" para acabar cos recortes no marco da actual Constitución, xa que defende que non pode haber diñeiro para a educación e a sanidade "se os impostos dos galegos emigran". A este respecto, argumentou que Galicia entrega 3.000 millóns de euros máis de impostos dos que logo o estado español inviste na comunidade.