​Villares anima a Feijóo a “irse se quere”

En Marea presentou este domingo aos seus candidatos oficiais polas catro provincias para as eleccións autonómicas do próximo 25 de setembro nun acto no que o aspirante á Presidencia da Xunta, Luís Villares, animou ao presidente da Xunta e dos populares galegos, Alberto Núñez Feijóo, a "irse se quere", xa que defende que terá que facelo tras os comicios.

En concreto, o maxistrado fixo alusión ás declaracións realizadas polo candidato popular á reelección nunha entrevista a Europa Press o pasado 31 xullo, na que o mandatario descartou ser "xefe da oposición" en caso de perder o Goberno.

Neste sentido, Villares asegurou que quedou en Galicia porque "nin Rajoy nin Esperanza (Aguirre)" lle deixaron irse. Con todo, precisou que quedará ata o 25 de setembro e "nada máis", xa que, apuntou, a súa formación se encargará de "sacarlle as cores a quen estivo roubando" e mostrou "pouco compromiso" durante os últimos anos de Goberno.

"Estes homes e mulleres representan a pluralidade, o multicolor e fan ruído, porque o que non fai ruído é a monarquía baltárica", expuxo o candidato, quen reivindica o proceso de primarias de En Marea. Así mesmo, asegurou que para "días grises" e "goberno negro" xa bastou cos populares e que será En Marea a que "traia a cor" ás políticas públicas e "saque as cores" aos que "estiveron a enganar e roubando".

BEIRAS, COMPROMETIDO

Entre o público asistente atopábase o portavoz de Anova, Xosé Manuel Beiras, quen anunciou este mércores que se deixaría "a pel" na campaña electoral e comprometeuse a "participar especialmente" nela para arroupar a Luís Villares.

Pola súa banda, os cabezas de lista polas diferentes provincias mostraron o seu apoio ao candidato, ademais de asegurar que En Marea "disputaralle as eleccións ao PP". En concreto, expuxeron as súas ideas o cabeza de lista pola Coruña, Antón Sánchez; a candidata por Pontevedra, Carmen Santos; e a cabeza de cartel por Ourense, Ánxeles Cuña.

CABEZAS DE LISTA

A Coruña - Antón Sánchez

O cabeza de lista fixou que "todo depende" de En Marea, pois o balance do goberno de Núñez Feijóo deixou "a destrución o emprego do sector agroforestal", o peche das caixas e "a emigración da xente nova". Así, denunciou que hai que "deixar o ruído" e "falar de futuro" para deixar que "a maioría social" mande.

Pontevedra - Carmen Santos

Asegurou que "nunca" dubidou de que todos xuntos ían finalizar compoñendo "unha marea multicolor" que está "chea de ilusión" e que, augurou, devolveralla á xente de Galicia. Por iso, sinalou que dentro dos grandes retos está "botar a todos os corruptos" e devolver o Pazo do Hórreo e San Caetano aos galegos.

Ourense - Ánxeles Cuña

A primeira da lista por Ourense presentouse como "unha recentemente chegada", á vez que celebrou o cumprimento dun dos principios fundamentais da formación: a participación. "Por encima das persoas está o que nos aglutina, o chamamento á confluencia, á xenerosidade", dixo.