Bruxelas mantén que os orzamentos de España deben ser presentados en Outubro
O Executivo comunitario evitou responder cales serán as consecuencias se España presenta a mediados de outubro unha prórroga do orzamento deste ano.
A Comisión Europea reiterou este luns que o Goberno de España debe presentar a Bruxelas o borrador do orzamento de 2017 o próximo 15 de outubro e que o mesmo día debe informar sobre medidas "efectivas" para corrixir o déficit das contas públicas.
"Como saben, como todos os Estados membros, España debe presentar o seu borrador orzamentario o 15 de outubro. Tamén debe informar nesa data sobre as accións efectivas, en liña co que decidiu o Consello da UE", sinalou en rolda de prensa o portavoz comunitario, Alexander Winterstein.
Os países da Unión Europea confirmaron a principios de agosto, en liña coa proposta do Executivo comunitario, a cancelación da sanción a España por incumprir o obxectivo de déficit o pasado ano.
A cambio desta cancelación e de outorgar a España dous anos extra para cumprir co obxectivo de reducir o déficit por baixo do 3%, os vinte e oito aprobaron reclamar un esforzo estrutural do 0,5% en 2017 e do 0,5% en 2018.
Así, o portavoz da Comisión Europea, preguntado por se a falta de Goberno en España preocupa a Bruxelas, contestou que a súa "esperanza" segue sendo que esa posible formar un Executivo "estable" que poida comprometerse cos seus socios comunitarios e coas institucións europeas.
"Esta segue sendo nosa esperanza, en particular vendo os retos" aos que se enfronta España, engadiu.
Doutra banda, o Executivo comunitario evitou responder cales serán as consecuencias se España presenta a mediados de outubro unha prórroga do orzamento deste ano. "Creo que debemos dar cada paso ao seu tempo, temos unha cita o 15 de outubro", resolveu Winterstein.
Escribe tu comentario