​Villares censura o "clásico anuncio" de Feijóo sobre Navantia en época electoral

O candidato de En Marea á Presidencia da Xunta, Luís Villares, censurou o "clásico anuncio" do mandatario autonómico, Alberto Núñez Feijóo, sobre carga de traballo para Navantia "15 días antes das eleccións" que, ou ben "pode ser unha mentira", como "fai catro anos con anuncios que quedaron en pouca cousa", ou "ten transcendencia" e, por tanto, faise un uso "electoralista".

Neste sentido, salientou que Navantia é "unha empresa pública" cunha "gran capacidade técnica" e do que destaca o uso do I+D e os seus traballadores. "E se se conseguen os contratos non é por Feijóo, se non pola boa calidade do traballo que teñen os traballadores do naval, que o sitúan como a mellor empresa do sector", remarcou.

Fronte a iso, Villares considerou que "un verdadeiro Goberno galego o que ten que facer é situarse por entrar dentro do Consello de Administración de Navantia para poder ser eficaz na xestión, mellorar as contas e mellorar a capacidade comercial".

Ademais, o candidato de En Marea defendeu a necesidade de que o Goberno galego, ademais, "arrime o ombreiro e colabore co resto de administracións para a construción dun dique seco", así como que siga "colaborando nos investimentos de I+D+i" para a relación entre Navantia e as universidades.

Tamén considerou que é preciso "renovar" o cadro de persoal de Navantia, que "rolda" os 60 anos, e que a "carga de traballo veña dunha xestión efectiva" e non de "un anuncio electoral".

ANUNCIO DE FEIJÓO

O presidente da Xunta en funcións e candidato do PPdeG á reelección, Alberto Núñez Feijóo, asegurou que, "nas próximas horas ou días", se concretará un novo acordo e contrato para Navantia en Ferrolterra, co que se "insistirá" na carga de traballo e na creación de empregos na comarca.

"Levamos traballando nese contrato desde hai algúns meses e espero que nas próximas horas, nos próximos días, podamos concretar e solemnizar un novo pedido no ámbito da eólica mariña", avanzou o dirixente popular.

Fontes consultadas por Europa Press estiman que se trata do proxecto de 'East Anglia One', desenvolvido pola empresa española Ibredrola, en alianza coa compañía sueca Vattenfall, para augas inglesas e que supón a instalación de ata 240 aeroxeradores mariños, dos que á empresa española lle pertencerían 102.

No caso de Navantia presentou unha oferta conxuntamente coa asturiana Windar para materializar ata 34 estruturas a construír nas instalacións da antiga Astano.

O presidente da Xunta remarcou tamén o compromiso do seu goberno de dotar "de carga de traballo pleno para os estaleiros desta comarca para o próximos dez anos, como mínimo".

Así, destacou que aos contratos do ámbito eólico mariño sumaráselle "a necesidade de construír barcos e fragatas para a Armada Española, ademais de para outras armadas do mundo", así como insistir nas melloras en "o peirao de reparacións e en investimentos no estaleiro para incrementar a capacidade produtiva".