​"Os incendios non se solucionan cunha elevación de penas"

O presidente do Tribunal Superior de Xustiza de Galicia (TSXG), Miguel Ángel Cadenas, non considera que o problema dos incendios forestais "se solucione cunha elevación de penas", tal e como demandou a conselleira do Medio Rural, Ángeles Vázquez.

De feito, indicou, nunha entrevista en Cadena Ser, que estas condenas xa son altas "cando hai risco para edificacións ou persoas". "En primeiro lugar, é un problema de educación e, en segundo, de proba", asegurou.

"O tipo de delito fai moi difícil a investigación; tal e como se incendian os montes, en moitos casos é dificilísimo atopar probas sobre a autoría do incendiario e mediatízase o rumbo do procedemento", explicou.

CORRUPCIÓN

Así mesmo, uns días despois da apertura do Ano Xudicial, Cadenas admitiu que a corrupción é "unha das grandes preocupacións dos xuíces e, por tanto, tamén da sociedade". E é que, segundo sinalou, "adquiriu unha dimensión" que a converteu "non só nun problema individual, senón xeral". "Incide na calidade democrática do noso país", apostilou.

A continuación, defendeu que as sospeitas sobre a falta de independencia xudicial "impútanse de forma xenérica, sen contido concreto". Ademais, manifestou que "carecen, en moitos casos, de sentido".

"Pódese falar de politización da Xustiza a través da composición dos órganos de goberno, pero en último termo quen decide é o xuíz e a responsabilidade é individual, unha obrigación personalísima que non pode delegar; calquera que sexan as presións que viren en torno seu, é el quen ten a última palabra", argumentou.

SALTO DE MAXISTRADOS Á POLÍTICA

Cadenas tamén defendeu o salto de maxistrados á política, como é o caso do candidato de En Marea á Presidencia da Xunta, Luís Villares. Trátase, precisou, dunha "opción persoal do xuíz que leva consigo, ineludiblemente, o abandono da carreira xudicial". "Polo menos temporalmente", engadiu.

E é que para Cadenas o problema non é a marcha, senón "o retorno dese xuíz da vida política á xudicatura". Unha viaxe, opinou, que para "algún compañeiro" debería ser "sen retorno". Por iso, considera que o debate sobre esa posibilidade "merecería a pena ser pulsado".

Sobre a falta de Goberno en España, esgrimiu que este feito "afecta" á Xustiza porque "hai reformas normativas pendentes", como a reforma da Lei de Planta Xudicial. Así mesmo, cuestionado sobre o risco de colapso xudicial no que respecta á actividade dos tribunais, considera que "un estado democrático non pode permitir que colapse a Xustiza" porque, sinalou, "colapsa a sociedade e o estado de dereito".

No que respecta ás macrocausas contra a corrupción abertas en Galicia, manifestou a súa esperanza de que "o ano que vén sexa decisivo para que todas esas causas de maior antigüidade poidan celebrar o seu xuízo oral", ao que, considera, "sa todas as penurias anteriores".

ANGROIS

Así mesmo, evitou poñer data ao xuízo do accidente de Angrois debido á "complexidade" das probas periciais encargadas polo xuíz tras reabrir a instrución, tal e como solicitara a Audiencia Provincial da Coruña.

Sobre o caso de Diana Quer, a moza madrileña de 18 anos desaparecida na Pobra do Caramiñal, argumentou que estes casos son "especialmente complicados pola incerteza que os rodea".