Extinguido o incendio de Entrimo tras queimar 3.000 hectáreas

Entrimo tras o incendio // @pgsarria

O incendio que comezou en Entrimo (Ourense), na parroquia da Illa, o pasado 6 de setembro, quedou extinguido este martes tras unha semana na que arrasou un total de 2.999,5 hectáreas, das que 1.300 son arborizadas.

Segundo informou a Consellería do Medio Rural, o lume quedou extinguido ás 13,40 horas deste martes, despois das últimas horas de choivas que rexistrou toda Galicia.

Este lume propagouse ata o municipio lindeiro de Lobios, e segundo as estimacións da Xunta das 3.000 hectáreas queimadas, unhas 1.300 son arborizadas.

Na súa extinción traballaron 13 helicópteros, catro avións, 84 motobombas, 62 axentes, 164 brigadas, dúas pas, así como un técnico. Tamén colaboraron efectivos dos Grupos de Emerxencias Supramunicipais e bombeiros comarcais.

CONTROLADOS

O incendio forestal declarado o luns na parroquia de Xironda no municipio ourensán de Cualedro permanece controlado na tarde deste martes tras queimar unhas 500 hectáreas.

Así o indicou a Consellería do Medio Rural, que puntualizou que este incendio permanece controlado desde as 9,59 horas deste martes tras iniciarse ás 14,20 horas do luns e queimar unhas 500 hectáreas.

Foron mobilizados para o seu control un técnico, 10 axentes, 17 brigadas, nove motobombas, catro pas e catro helicópteros. Tamén colaboraron voluntarios de Protección Civil, bombeiros comarcais e a UME.

Ademais, o departamento de Medio Rural destacou que nesta xornada de choivas matinais, en Galicia "non hai lumes activos", segundo o parte facilitado ata as 16,00 horas deste martes.

EXTINGUIDOS

Esta xornada tamén quedaron extinguidos os incendios rexistrados nas parroquias de Castro de Laza e Camba no municipio de Laza (Ourense), así como os lumes da parroquia de Vilarello en Cervantes (Lugo) e de Rebordondo na localidade ourensá de Monterrei.