​Jorge Suárez agarda que o PSOE siga no goberno de Ferrol

|

Jorgesurezferrolalcalde


O alcalde de Ferrol, Jorge Suárez, asegurou que as dúas concelleiras do PSOE contrarias a saír do goberno local, María Fernández Lemos e Rosa Méndez, decidiron "delegar a firma" ata que os órganos superiores do seu partido "resolvan".


"Permanecen á expectativa de que se resolva este conflito, no que nós non temos nada que dicir por ser un asunto interno do PSOE", remarcou Suárez.


Na mesma liña, declinou analizar "as decisións internas" do PSOE. "É cousa deles, teñen os seus órganos, os seus estatutos, e nós estamos aquí á expectativa de conformar un goberno estable tras estas saídas", resolveu.


En canto á delegación por parte das concelleiras de Urbanismo e de Zona Rural, o rexedor confirmou que "recae" sobre el. "É algo provisional, evidentemente", resolveu.


Adicionalmente, a preguntas dos xornalistas, Suárez si confirmou que Fernández Lemos  o acompañou o martes a un encontro de traballo cunha entidade veciñal para abordar asuntos relativos ao plan municipal.


RESPOSTA A BARCÓN


Ao fío diso, o primeiro edil de Ferrol tamén se referiu á petición cursada pola líder do PSOE na Coruña, Mar Barcón, para que o seu partido "repense" a relación coas mareas nas tres cidades da provincia da Coruña.


"Se o Partido Socialista quere organizar unha reunión ou unha merenda, se o considera oportuno, non o vou valorar, son cuestións dese partido", opinou, antes de sinalar a esa formación como "un aliado preferente" ao que segue "respectando moitísimo" e co que ten "un pacto programático".


Iso, ao seu entender, "é o que realmente importa". Polo demais, abundou sobre que agora está "á espera de que tome as decisións oportunas sobre se continúa no goberno ou non". "Eu espero que si", finalizou Suárez.


E, tras puntualizar que non pretende "entrar en pelexas no barro", porque non lle gusta "o lodo", rexeitou pronunciarse sobre as palabras do alcalde de Ares, o socialista Julio Iglesias, nas que acusou o rexedor ferrolán de estar a realizar "un chamamento ao transfuguismo" ao contar con dúas concelleiras do PSOE.


VERSIÓN DE ROSA MÉNDEZ


Pola súa banda, Rosa Méndez asegurou, en declaracións a Europa Press, que acata a decisión do grupo municipal socialista aínda que "non" a comparte e que é por iso polo que volveu pedir que "medie alguén alleo", en referencia a órganos superiores do PSOE.


Ademais, deixou claro que o martes non estivo no seu despacho do concello e que "non" moveu "un papel". "Só traballei nas miñas clases", aseverou, en alusión ao seu traballo como docente.

relacionada ​Las ciudades de las mareas, en riesgo de contagio por la ruptura en Ferrol
relacionada As diferenzas persoais rachan o goberno de coalición de Ferrol
relacionada Sestayo: "Jorge Suárez fai da nova política a incitación ao transfuguismo"

Sin comentarios

Escribe tu comentario




No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Pressdigital
Plaza de Quintana ,3 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS LOS DERECHOS. EDITADO POR POMBA PRESS,S.L.
Aviso legal Cookies Consejo editorial
Powered by Bigpress