​O xuíz pide trasladar a nova documentación aos peritos

|

Angrois 11


O titular do Xulgado de Instrución número 3 de Santiago, Andrés Lago Louro, pide trasladar a nova documentación presentada por Adif aos peritos Frans Heijnen, James Robert Catmur --designados por QBE, a aseguradora de Renfe-- e Enrique Castelo Ron --catedrático ao que o perito xudicial Juan Carlos Carballeira encargou un informe-- para que manifesten, todos eles, "se manteñen ou modifican" as súas conclusións.


Solicítao a través dun auto, ao que tivo acceso Europa Press, emitido este martes para comunicar o novo adiamento da vista na que debían comparecer, este mércores, os tres peritos, para ratificar xudicialmente os seus informes "iniciais", segundo precisa o maxistrado.


Agora, a nova data está fixada para o 18 de outubro, ás 9,00 horas no caso dos dous primeiros e ás 11,00 horas no caso do terceiro.


"A presentación de nova documentación directamente vinculada co obxecto da dita ratificación pericial esixe que, con carácter previo á práctica da dita dilixencia, os peritos e as partes tivesen tempo suficiente para coñecer o seu contido e realizar a posteriori matizacións e preguntas que estimen necesarias", argumenta.


En caso de non acceder á solicitude de suspensión que expuxeron "varias partes", Lago Louro admite que "a eficacia da ratificación pericial quedaría seriamente mermada, non sendo descartable a súa ultierior reiteración".


A maiores, o instrutor solicita enviar a documentación aos tres peritos xudiciais, aos que encargou o 1 de setembro, no prazo de tres meses, un novo informe para dilucidar se Adif avaliou correctamente o risco na curva da Grandeira.


AUTO DE SETEMBRO


Ese día, a través dun auto, o xuíz demandaba a estes peritos que arroxasen luz sobre "se son ou non correctas as avaliacións de risco realizadas nos informes de Castelo e Heijnen e a determinación do nivel de risco resultante na curva e a súa aceptabilidade técnica"; así como "a corrección ou non da exportación de riscos ao maquinista ou Renfe nos termos en que foi efectuada".


Tamén quería que se aclarase "se é certo que, como se alude polo informe Heijnen, existía un consenso técnico entre os expertos sobre a necesidade de protección das transicións significativas de velocidade mediante sistemas de control continuo ou puntual". Na causa incluíuse ese día un informe pericial complementario realizado por Heijnen e Catmur.


DOCUMENTACIÓN DE ADIF


Este luns, a dous días da vista dos peritos, Adif enviou 300 folios ao xulgado acompañados por un escrito da Avogacía do Estado no que esta admitía que omitira "por erro" esta información, ao seu xuízo "relevante".


Con todo, distintos expertos e partes acudidas na causa consideran que con estes documentos o que busca a entidade pública empresarial é "torpedear" a investigación, ao tratarse dunha análise de risco "parcial" similar a outro xa obrante na causa.

relacionada ​Vítimas cren que Adif trata de "torpedear" a investigación coa nova documentación
relacionada A nova documentación de Adif obriga a aprazar as comparecencias xudiciais previstas
relacionada ​Adif omitíu "por erro" documentación "relevante" sobre Angrois durante máis de 3 anos

Sin comentarios

Escribe tu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.
Este periódico fue seleccionado por Google News Initiative para su Journalism Emergency Relief Fund

Pressdigital
Plaza de Quintana ,3 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS LOS DERECHOS. EDITADO POR POMBA PRESS,S.L.
Aviso legal Cookies Consejo editorial Publicidad
Powered by Bigpress