​A Unión Europea interésase polo plan de compostaxe pontevedrés

César Mosquera, durante a rolda de prensa. //Foto: @depo_es twitter

O vicepresidente da Deputación de Pontevedra, César Mosquera, asegurou que o plan de compostaxe que impulsa a administración provincial suscitou o interese da Unión Europea.

Díxoo na rolda de prensa na que se anunciou que xa está en activo a segunda fase desta iniciativa, á espera de que o vindeiro venres 14 se aprobe por parte da xunta de goberno as axudas pola cantidade de 1.250.000 euros destinadas a aqueles municipios que queiran cambiar o sistema de tratamento de lixo.

A Deputación de Pontevedra subvencionaría a compra dos composteiros para que se reduza o traslado de residuos orgánicos á planta de Sogama.

César Mosquera explicou que o feito de que a Comisaría Europea de Medio Ambiente se interese neste proxecto dá "maior valor" a esta proposta, que pretende converter esta experiencia alternativa en "universal". Ademais, apuntou que é unha "iniciativa única" neste ámbito e que está a resultar interesante internacionalmente.

A FINAIS DESTE MES

O enxeñeiro químico Carlos Pérez, asesor técnico de Residuos da Deputación, sinalou que se espera que a finais deste mes comecen a sacar o compost en varios dos 35 concellos da provincia nos que se instalaron os composteros.

Reduciuse o tempo de elaboración a tres e catro meses cando habitualmente o compost en plantas industriais elabórase nun proceso de entre catro e seis meses. Esta aceleración, segundo o asesor, débese á achega de proteínas e nitróxeno a través de restos de comida como carne ou peixe e tamén ao proceso seguido durante estes últimos meses.

Ademais, segundo os responsables dese proxecto, a calidade do compost está a ser de cateogoría A, a máis alta, para que poida ser empregado nas hortas.

"COMPOSTA EN REDE"

Os días 20 e 21 de outubro o Pazo da Cultura de Pontevedra acollerá o congreso 'Composta en Rede', nunha edición que está a suscitar un gran interese, atendendo ao récord de inscricións.

Segundo informou César Mosquera, a este encontro sobre compostaxe acudirán expertos de toda España ademais de diferentes colectivos ecoloxistas. O congreso é gratuíto e a inscrición permanece aberta ata o día do inicio.

Ao mesmo tempo, o vicepresidente provincial tamén sinalou que se convocarán cursos para formar persoas sobre aspectos básicos do tratamento de residuos para a elaboración de compost.