​Investigan a un exmozo de Diana Quer que lle enviaba ameazas

Un exmozo de Diana Quer, supostamente investigado como un dos sospeitosos na desaparición da moza hai xa dous meses, podería terlle enviado mensaxes ameazantes hai aproximadamente un ano, tanto por WhatsApp coma por redes sociais, que posteriormente foron borradas. Trátase da primeira vez que as investigacións do caso apuntan a unha persoa da contorna da moza madrileña.

Segundo diversos medios de comunicación, as supostas mensaxes convertéronse nunha importante "fonte de pistas" para os investigadores do 'caso Diana Quer' , que centran o foco en desvelar máis polo miúdo a relación de Diana con este mozo que rematou hai varios meses.

PERFÍS DE SOSPEITOSOS

Porén, esta nova información contrasta coa coñecida hai uns días de que a Garda Civil estaría elaborando un perfil de sospeitoso neste caso. Segundo o xornal La Voz de Galicia, o individuo, que non tería polo momento nome nin apelidos, oscilaría entre os 30 e os 40 anos. Ademais tería antecedentes policiais ou xudiciais pola comisión de delitos de características violentas (crimes de agresión sexual e violencia machista) e de tráfico de drogas.

Tal perfil apoiaríase na base de datos da propia Garda Civil, informa o mesmo diario, ademais de noutras fontes coñecedoras de ambientes "turbios" na comarca, imaxes daquela madrugada e os testemuños recollidos a semana pasada.

FACEBOOK

Por outra banda, o xoves pasado coñeciamos por medio de Antena 3 que o Facebook de Diana Quer volveu estar activo a sesenta días da súa desaparición, segundo indicarían amigas da moza. A mesma canle rebela que os investigadores do caso analizan o por que deste feito. O espazo persoal desta rede social tivo actividade nas últimas horas, con indicacións nas que se mostra que desde ese perfil se consultaron publicacións doutros perfís.

VALERIA QUER

Por outra banda, os pais de Diana Quer atopáronse hoxe logo de mes e medio sen verse. Foi con motivo de acudir aos Xulgados de Pozuelo de Alarcón (Madrid) onde se decide sobre a custodia da súa filla pequena, Valeria, de 16 anos de idade.