Adeus a Leonard Cohen

O cantautor e poeta canadense Leonard Cohen faleceu este xoves aos 82 anos de idade, segundo un breve comunicado publicado na súa páxina na rede social Facebook.

"Con profundo pesar informamos que o lendario poeta, compositor e artista Leonard Cohen faleceu", apunta. "Perdemos a un dos máis respectados e prolíficos visionarios da música", agrega.

Así mesmo, o comunicado sinala que se celebrará unha homenaxe nos Angeles nunha data aínda por determinar, engadindo que a familia pide privacidade durante o período de dolo.

Cohen, nacido en 1934 na localidade canadense de Westmount, é considerada unha das figuras máis importantes da música no século XX, e en 2011 foi galardoado co Premio Príncipe de Asturias das Letras.

Así mesmo, é membro do Salón da Fama do Rock&Roll de Estados Unidos e do Salón da Fama Musical de Canadá, ademais de membro da Orde de Canadá.

O artista iniciou a súa carreira musical nos anos sesenta e a súa prolífica carreira estendeuse durante máis de cinco décadas, coa publicación recente do seu último disco, 'You want it darker', que saíu á venda en outubro.

Cohen chegou a ser unha das figuras máis influentes da súa xeración e a calidade das súas composicións sitúano tamén entre os máis destacados cantautores, xunto a Bob Dylan, Paul Simon ou Joni Mitchell, tal e como destaca a resvista 'Rolling Stone'.

As súas cancións, marcadas pola súa voz grave, centrábanse en asuntos como o amor, a espiritualidade, a guerra, o sexo ou a depresión.

SEN MEDO Á MORTE

Nunha entrevista concedida recentemente, no marco do lanzamento do seu novo disco, Cohen afirmou que "non temía á morte", agregando que estaba "preparado para morrer".

O cantautor estivera desde 2013 lonxe dos focos, e nos últimos meses permanecera case enclaustrado na súa vivenda por problemas de costas.

De feito, 'You want it darker', producido polo seu fillo Adam, foi gravado cun computador na cociña da casa.

O falecemento de Cohen ten lugar apenas tres meses despois do do seu gran amor e maior inspiración, Marianne Ihlen, por mor dunha leucemia.

A ela foi a quen escribiu cancións como 'Bird on a wire', 'Hey, that's no way to say goodbye' ou a soada 'So long, Marianne'.

Cohen afirmou recentemente ten aínda unha serie de poemas e cancións sen publicar ou gravar, apuntando que quizá faría un libro que, "do mesmo xeito que no Talmud hebreo, estea cheo de pasaxes para a interpretación de quen o lea".

"O gran cambio é a proximidade á morte", indicou. "Son un tipo de persoa ordenada. Gústame ter as cousas ben atadas. Aínda que se non podo, tampouco pasa nada. Pero o meu impulso natural é o de terminar as cousas que empecei", remachou.