​Ninguén asume a culpa das multas por aparcar mal no Cunqueiro

Os grupos municipais de PSOE e PP no Concello de Vigo encerelláronse este luns pola tramitación de multas de tráfico aos usuarios do Hospital Álvaro Cunqueiro (HAC) que aparcan de forma incorrecta, durante o debate dunha moción sobre a circulación e a seguridade viaria na contorna do dito centro sanitario.

O PSOE presentou para o seu debate no Pleno unha moción na que insta á Xunta de Galicia a "corrixir todas as deficiencias" na seguridade viaria na contorna do Hospital, á vez que reclama a gratuidade dos aparcadoiros de consultas e de urxencias como "medida inmediata".

Na presentación da moción, o edil socialista Carlos López Font denunciou o "caos diario" da circulación nos accesos do HAC e instou o goberno galego a "pedir perdón" por facer de forma unilateral a ordenación do tráfico neses viarios, sen consultar co Concello de Vigo.

Pola súa banda, o portavoz de Marea, Rubén Pérez, lembrou que o goberno municipal facilitou a apertura do HAC, e mesmo as conexións de servizos e a construción de accesos, en virtude do acordo entre PP e PSOE para a aprobación dos orzamentos municipais de 2014. Así mesmo, sinalou que "os veciños aparcan mal" nos accesos do hospital, ocasionando problemas de tráfico, "porque o alcalde lles dixo que non se lles ía multar".

MULTAS POR MAL APARCADOIRO

Na mesma liña, o concelleiro do PP, Miguel Fidalgo, aseverou que "quen debería pedir perdón é o concelleiro de Seguridade e Tráfico, señor Font, por alimentar o incumprimento das normas de tráfico e seguridade". "Vaia irresponsabilidade e caradura traer agora esta moción", engadiu.

Segundo Fidalgo, o alcalde de Vigo e o seu goberno actuaron de forma "neglixente" porque "se fartaron de dicir que non se ían poñer multas", co obxectivo de "xerar un conflito institucional para logo botar a culpa á Xunta, e todo á conta de provocar un caos circulatorio". "Agora poñen multas porque lles entrou o medo", sentenciou.

Ante estas acusacións, o concelleiro de Seguridade e Tráfico, Carlos López Font, advertiu de que "a gravidade de todo o relacionado co Hospital Álvaro Cunqueiro correspóndelle á Xunta", e subliñou que é a concesionaria a que denuncia de oficio aos coches mal aparcados. "Son as multas da concesionaria e de Feijóo. Non hai nin unha soa denuncia da Policía Local", sentenciou.

A moción presentada polo grupo socialista foi aprobada cos votos favorables do PSOE e do grupo Marea de Vigo, mentres que o PP votou en contra.