A Xunta mobiliza 4 millóns para a execución do Plan Renove de ascensores

A Xunta mobilizou este ano máis de 4 millóns de euros para a execución de máis de 130 proxectos en comunidades de veciños galegas dentro do Plan Renove de Ascensores, que busca a instalación de máquinas máis eficientes e seguras.

A resolución desta orde, publicada este luns no Diario Oficial de Galicia, beneficia a un total de 133 comunidades e unhas 2.700 vivendas, que contan con axudas de ata o 50 por cento do custo do proxecto.

Os novos ascensores que se instalan a través deste Plan Renove permiten a redución anual, polo menos, do 35 por cento do uso de enerxía convencional, ademais de supoñer un incremento no nivel de seguridade. Os apoios inclúen os custos en equipamento material, obra civil e man de obra asociados á reforma e posta en servizo das máquinas.

Esta actuación encádrase no desenvolvemento do Plan de Aforro e Eficiencia Enerxética nas Vivendas, posto en marcha o ano pasado e que, xunto a esta iniciativa, promoveu outro tipo de medidas como a implantación de xanelas ou caldeiras máis eficientes ou a instalación de equipos de geotermia, solar térmica e aerotermia.