O PP de Pontevedra pide a Lores "madurez política" na negociación dos orzamentos

O portavoz do PP en Pontevedra, Jacobo Moreira, requiriu este martes "madurez política" ao alcalde, Miguel Anxo Fernández Lores, de quen criticou a súa "incapacidade" para dialogar sobre os orzamentos. É máis, xulgou que a súa decisión de vincular a aprobación das contas a unha cuestión de confianza "reflicte o declive" do nacionalista.

Fronte a iso, en rolda de prensa, Moreira tendeu a man ao goberno local para "negociar" e, así, "darlle unha saída digna a Lores".

É máis, reivindicou que as súas emendas aos orzamentos municipais "son asuntos nos que están de acordo a maioría dos pontevedreses". En concreto, pediu unha rebaixa do IBI, a implantación do transporte urbano e a aprobación inicial do plan municipal.

"Quen pode estar en contra de definir o futuro da cidade cunha novo PXOM?", preguntouse Jacobo Moreira.

Ademais, denunciou que o goberno local está "a asoballar" aos funcionarios para que redacten "informes exprés" cos que cuestionar todos os escritos da oposición. "Mentres a nós esíxellenos motivar as emendas, ao BNG sérvelle con dicir que son os mellores orzamentos para a cidade", criticou.

"NON PODE SER ASÍ"

A continuación, o concelleiro do PP incidiu en que Lores "quere aprobar o seu orzamento aínda que non lle guste a ninguén" e iso "non pode ser así".

"Non ten maioría absoluta e ten que negociar cos outros partidos. Nós seguimos tendéndolle a man", concluíu, non sen advertir de que Pontevedra "non pode ser continuamente o centro de atención polas tolemias do alcalde".