A oposición pide a devolución da lei de acompañamento das contas por falta de transparencia

|

Oposicionvillleicrodil


En Marea, PSdeG e BNG presentaron emendas á totalidade de devolución ao proxecto de lei de medidas fiscais, administrativas e de ordenación, a coñecida como lei de acompañamento aos orzamentos da Xunta de 2017. Os grupos da oposición consideran que esta norma é "contraria á transparencia".


Esta crítica común realízana a través dos tres textos que publica o boletín oficial do Parlamento de Galicia e que recolle Europa Press, tras a súa presentación na comisión de economía, facenda e orzamentos da Cámara autonómica.


Pola súa banda, En Marea fai referencia aos pronunciamientos do Consello Económico e Social, do Consello Xeral do Poder Xudicial e do Consello de Estado sobre as leis de acompañamento, "como elementos que favorecen o risco de dispersión dunha normativa á que se lle subtrae coherencia e dificulta a súa comprensión global, co risco eventual de provocar inseguridade xurídica nos intérpretes e aplicadores das normas".


Tamén os socialistas aluden ás "críticas unánimes" da doutrina, e advirten da "extensa amálgama de preceptos inconexos e sen un criterio minimamente homoxéneo, que resulta contraria á necesaria transparencia, crebando o principio de seguridade xurídica, modificando aspectos lexislativos moi relevantes a través dunha utilización espúrea desta figura".


O Bloque, mentres, carga contra esta incorporación de "medidas inconexas sen relación directa coa xestión do gasto público", algo que atribúe a "prácticas dun Goberno absolutista, incapaz de debater de forma ampla e acordar cos sectores afectados ningún tipo de medidas regulatorias".


20 NORMAS


En Marea apunta que o proxecto de lei modifica "nada menos" que 20 normas legais, e tres decretos. No apartado de medidas fiscais, critica que "a tan cacareada política de impostos cero no rural se traduce nunha modificación para unha dedución para vivenda habitual por discapacitados, familias numerosas e menores de 36 anos para zonas pouco poboadas e rurais".


En canto ás medidas administrativas, censura que se cambian aspectos da lei de emprego público "que afectan especialmente o persoal laboral". Modificacións que tamén son "relevantes" no caso da lei de mellora de estrutura agraria de Galicia e "substanciais" para a lei de montes.


No relativo á ordenación do sistema de transporte público regular de viaxeiros, reproba que o Executivo busca "garantir a continuidade das concesións cuxa prórroga automática foi anulada polo Tribunal Supremo".


Tamén as medidas provisionais de ordenación urbanística entende que "esconden un instrumento que ten por finalidade eludir o cumprimento das sentenzas xudiciais firmes que anularon os plans de Ares, Rábade, Melón, Ourense, Gondomar e Vigo".


"Estas e outras modificacións conforman unha lei de medidas fiscais e administrativas que se utiliza como instrumento para esquivar o debate, para opacarlo, para desprezar o cumprimento das sentenzas xudiciais e para seguir no camiño da improvisación constante e a inseguridade xurídica", reprocha.


APROVEITAMENTO "INTERESADO"


O PSOE coincide en que este mecanismo "imposibilita poder profundar en diversas cuestións, ao estar supeditadas á lei orzamentaria e ser tramitadas polo procedemento de urxencia, con detrimento da calidade política e xurídica".


Incide, así, en que esta lei "aproveita de maneira interesada a axilidade procedimental da lei de orzamentos, pero sen verse afectada polas súas restricións".


Lamenta que, con ela, "impídese coñecer con rigor, profundidade e o detemento necesario, todas e cada unha das cuestións incluídas nela", e conclúe que a norma "mostra o retroceso democrático que está a ter o Goberno da Xunta de Galicia, modificando dúas ducias de leis, tanto fiscais como administrativas".


"NADA RECEPTIVO Á PARTICIPACIÓN"


Os nacionalistas afirman que "realmente" esperaban que as apelacións a un tempo no que se forxase unha política en base a acordos a favor dos intereses xerais de Galicia "trouxesen como consecuencia unha normalidade democrática e parlamentaria".


"Con esta iniciativa, pola contra, o Goberno galego expón unha emenda total ao que predica, renega plenamente da súa alocución para fomentar procedementos máis abertos, participativos e plurais", asevera.


Deste xeito, observa que "se volve de cheo a un goberno que procura o debate 'exprés', dentro das paredes dos despachos institucionais e nada receptivo á transparencia e á participación social".

relacionada ​En Marea demanda a devolución da lei de acompañamento dos orzamentos

Sin comentarios

Escribe tu comentario




No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Pressdigital
Plaza de Quintana ,3 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS LOS DERECHOS. EDITADO POR POMBA PRESS,S.L.
Aviso legal Cookies Consejo editorial
Powered by Bigpress