​En Marea demanda a devolución da lei de acompañamento dos orzamentos

|

Luisvillaresantonsanchez


En Marea presentou unha emenda de devolución á lei de acompañamento dos orzamentos da Xunta, xa que "este ano é especialmente escandalosa para coar pola porta de atrás modificacións lexislativas profundas", que "deberían estar precedidas dun debate" en leis como a do chan aprobada este ano, de montes, de emprego público, transporte e estrutura agraria.


En rolda de prensa en Santiago, Antón Sánchez (En Marea) criticou que o PP "opta unha vez máis pola opacidade", "pola improvisación e a chapuza" para "favorecer determinados intereses". Así, puxo como exemplo que a Xunta "busca unha artimaña" para "consolidar" a prórroga de concesións ao transporte, pois dá luz verde a que nesta lei de acompañamento se permitan cambios para "novos servizos", "mesmo antes da aprobación do plan de transporte público de Galicia".


De tal forma, avanzou En Marea solicitará a creación dunha comisión de traballo para aprobar o plan de transporte público de Galicia.


"SE NON FOSE POLA SÚA CONDICIÓN DE AFORADOS ESTARÍAN IMPUTADOS"


No tocante a este extremo, Sánchez referiuse á listaxe de políticos dos agasallos enviados polo empresario lugués Raúl López, propietario do Grupo Monbus e investigado no marco da 'Operación Cóndor', no que se incluían entre outros o actuais presidente e vicepresidente da Xunta, Alberto Núñez Feijóo e Alfonso Rueda, no que considera "un caso claramente tipificado no Código penal" como "suborno impropio".


Por iso, tanto Sánchez como o portavoz parlamentario de En Marea, Luís Villares, reclaman explicacións políticas desta "coincidencia" de que adxudicatarios envíen agasallos a Feijóo e Rueda.


Uns agasallos que "superaban por moito o que se considera un uso social", avisa Sánchez, con "Vega Sicilia que superaban os 600 euros", que "non eran enviados ao azar" e "que non se devolveron".


Todo iso, "mentres neses anos a Xunta adxudicou ata 13 millóns a Monbus" e "tomaron decisións lexislativas e normativas que beneficiaron á empresa", como a prórroga de 10 anos a 129 concesións de transporte público que foron anuladas polo Tribunal Supremo.


"Se non fose pola súa condición de aforados hoxe estarían imputados", reiterou Sánchez, nunha afirmación que tamén defendeu este xoves Luís Villares, do mesmo xeito que nos últimos días.


A continuación, Villares deixou claro que "con independencia de que os feitos que están a ser investigados penalmente sexan ou non delito, a responsabilidade política é evidente e débese dar conta", ante unha "relación clientelar" entre unha administración pública que concede un servizo e un particular "que é o adxudicatario do contrato", o que "crea alarma social".


OUTRAS MEDIDAS POLÉMICAS


Así mesmo, Antón Sánchez lamenta que na lei de acompañamento a lei do chan "modifícase de facto" para facela "a medida" do alcalde popular de Ourense, Jesús Vázquez, despois de que o Tribunal Superior de Xustiza de Galicia (TSXG) declarase ilegal e anulase a ordenación provisional da cidade. Unha cuestión que ve exemplo de que o PP "traballa a golpe de sentenza" e "non ten un modelo de país".


No tocante á lei de montes, reprocha que "se pretende profundar nun modelo que favorece as grandes empresas como ENCE", "ampliando o chan onde se pode repoboar", "derrogando o decreto que limitaba a potencia das instalacións de biomasa a 10 megawatts", nun conxunto de medidas que "cambian o modelo forestal".


A isto únense que en 27.000 núcleos "poderanse instalar granxas de porcos ao pé das casas", mentres que a aposta do PP polo impostos cero no rural "tradúcese en 2,3 millóns de euros, unha cantidade ridícula".

relacionada Noriega: "Villares ten que ter un papel fundamental na construción de En Marea"
relacionada PSdeG e En Marea instan a Feijóo a explicar no Parlamento os agasallos de Monbus

Sin comentarios

Escribe tu comentario




No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Pressdigital
Plaza de Quintana ,3 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS LOS DERECHOS. EDITADO POR POMBA PRESS,S.L.
Aviso legal Cookies Consejo editorial Publicidad
Powered by Bigpress