O principio de acordo no lácteo, en Madrid non logra desactivar as protestas

Asamblea de gandeiros en Santiago na noite do xoves 10

Os gandeiros en pé de guerra en Lugo e Santiago manterán a ofensiva polos problemas de rendibilidade de moitas explotacións despois de que a esperada reunión entre todos os elos do sector e o ministerio culminase este xoves cun principio de acordo do que se desmarcan, polo momento, dúas organizacións agrarias e que rexeitan desde a marea gandeira xurdida na capital lucense. 

Agricultura levou á cita un borrador de acordo que insta as industrias a garantir a recollida do leite nas granxas a importes que permitan a súa sustentabilidade e a "compartir" cos gandeiros a revalorización que obteñan nos prezos de cesión ás grandes superficies. Estas, pola súa banda, teñen que establecer coas industrias contratos a longo prazo e comprométense a non usar o leite como reclamo.

Ambas as partes —a través das patronais da distribución Anged, Asedas e Aces e da Federación de Industrias Lácteas (Fenil)— xa decidiron que rubricarán o documento proposto polo Goberno axiña que como se perfilen algúns detalles pendentes, un paso que tamén están dispostas a dar as organizacións Asaja e Cooperativas-Agroalimentarias a pesar de pedir algunhas modificacións técnicas. Por contra, Upa e Coag néganse a aceptar ese borrador nos termos actuais e disponse a preparar as súas alegacións para facelas chegar ao ministerio de aquí ao martes.

Polo momento, e tras non ver plasmadas no texto as súas condicións para pór fin a oito días de protestas na capital lucense e catro en Compostela, os produtores decidiron este xoves seguir adiante coa súa batalla. Os de Lugo manterán os seus tractores na cidade polo menos ata o martes e levarán os seus actos de protesta fóra da muralla, coa industria e a distribución no punto de mira.

Ambos os elos serán o obxectivo tamén da Plataforma en Defensa do Sector Lácteo, que este xoves decidiu nunha asemblea celebrada a altas horas da noite empezar a retirar este venres tractores de Santiago para iniciar un calendario (aínda por pechar) de bloqueos a todas as industrias.