A xuíza estreita o cerco sobre Baltar
Mantén a súa citación como investigado por suborno, admitindo a consideración da muller que o denunciara como suposta prexudicada por acoso sexual
A xuíza que leva o caso Baltar estreita o seu cerco, desestimando os recursos presentados pola Fiscalía e polo propio presidente da Deputación de Ourense e mantendo a citación de Manuel Baltar como investigado por presuntos delitos de suborno e tráfico de influencias.
Pero e que ademais, tamén engade a consideración de suposta prexudicada por acoso sexual para a muller que o denunciou, que ata agora estaba citada tan só como investigada. Esta decisión reforza a posibilidade de que a causa siga adiante, xa que habilita a esta muller para exercer a acusación particular, nun caso no que a fiscalía xa deixou clara a súa postura. Ata agora, o único que parecía manter o caso aberto era a acusación popular de Democracia Ourensana.
Ambas citacións están fixadas para o vindeiro 10 de marzo. A xuíza tratará de determinar se houbo un delito de acoso sexual, como mantivo dende o primeiro momento a denunciante, asegurando que Baltar lle ofrecera un emprego a cambio de sexo. Tamén terá que determinar se existiu un delito de suborno e tráfico de influencias por parte dos dous investigados.
Escribe tu comentario