Alerta laranxa na costa galega

A Semana Santa comezou moi ben, pero o tempo foi empeorando progresivamente. Un temporal de vento afectará durante a tarde deste sábado ao litoral galego, obrigando a activar a alerta laranxa na costa da Coruña e Pontevedra e a amarela na Mariña Lucense.

Segundo a información de Meteogalicia, o aviso será de nivel laranxa na costa da Coruña e Pontevedra desde as 18.00 horas do sábado, por ondas de entre cinco e seis metros. O aviso estenderase así mesmo todo o domingo. Previamente, entre as 12.00 e as 18.00 horas, o aviso será de nivel amarelo nesta zona.

Pola súa banda, A Mariña Lucense permanecerá no mesmo período en alerta amarela por ondas de entre 4 e 5 metros, que pasará a ser de nivel laranxa o domingo, segundo as previsións actuais.

Durante o sábado tamén está previsto un temporal de vento de nivel amarelo con ventos de entre 80 e 100 quilómetros por hora que afectará desde primeira hora da mañá ata as 18.00 horas á provincia da Coruña, o interior de Pontevedra, a Mariña Lucense e as montañas de Lugo e Ourense.