Haberá debate televisivo entre os candidatos de Podemos Galicia

Os candidatos á secretaría xeral de Podemos Galicia participarán nun debate televisivo o vindeiro 12 de abril, presentando as súas propostas de cara ás eleccións primarias. 

Será o primeiro de varios posibles debates, que chegarán despois de que Breogán Riobóo rexeitase participar no debate proposto por Ángela Rodríguez para este mesmo sábado, considerando que era "pouco imparcial e neutral", ademais de ser antes de que comezase o prazo oficial de campaña. 

"Non estamos dispostos a saltar as regras unha vez máis, como outras persoas fixeron", contestou Riobóo este xoves a preguntas da prensa sobre esta cuestión durante a presentación en Santiago da candidatura coa que aspira a renovar o seu cargo nas próximas eleccións primarias de Podemos Galicia.

Por iso, avisou á candidata á Secretaría Xeral de Podemos Galicia e deputada de En Marea, Ángela Rodríguez, que cando hai un proceso que "está regulado", sostén, "hai que respectar esas normas".

"Ademais, por descoido ou casualidade é probable que se esquecese de que eu son o secretario xeral de Podemos Galicia e que este sábado teño un consello cidadán estatal, que é o día 2", agregou.

Posteriormente, Ángela Rodríguez foi cuestionada por este tema para sinalar que fixo a proposta dun debate o sábado debido a modo de "centralizar" as "moitas ofertas" de diversos círculos para levalo a cabo.

A continuación, Rodríguez subliñou que está "totalmente disposta" a "debater en calquera contexto", xa que á súa candidatura gústalle " a democracia". "Por respecto á nosa militancia temos a obrigación de facer estes debates e alí onde nos conviden estaremos", finalizou.